Iha selebrasaun ne'e, Francisco Jerónimo Martins hato'o parabéns ba feto sira hotu-hotu iha TL, tanba haree ba istória pasadu, feto mós importante iha luta ba ukun rasik-aan no ohin loron feto sai nafatin ema importante iha nasaun TL.
“Ministériu Asuntu Parlamentár mai iha ne’e atu mai partisipa iha loron feto ninian neebé mak ninia komemorasaun halo iha parlamentu nasionál, hanesan mós membru governu ida hakarak mós fó solidariedade no fó ami nia parabéns ba feto Timor ba sira nia luta, sira nia servisu, sakrifísiu ne'ebé sira halo ba rai ida ne'e. Ohin loron ita tenke rekoñese katak feto mós importante iha nasaun ida ne'e”, Francisco Jerónimo Martins hateten ba www.tempotimor.com iha PN, Kinta (05/11).
Nia dehan, ema hotu-hotu tenke fó ninia parabéns, fó ninia apoiu tomak feto sira, atu nune'e servisu ne'ebé sira halo, feto mós bele foti desizaun ne'ebé importante ba rai ida ne'e.
Tuir nia, durante observasaun haree katak feto TL pursentu 30 (30%), partisipa iha Parlamentu nasionál, iha prosesu foti desizaun polítika nomós oinsá maka haree ba funsionamentu lei ba dezenvolvimentu rai TL ba futuru.
“Ne'ebé ha'u dehan dala ida tan, iha Azia karik, Timor sai ezemplu karik, tanba porsaun boot liu ne'e feto iha Parlamentu nasionál foti desizaun polítika ne'e boot”, nia hateten.