Ministru Francisco husu ne'e iha serimonia abertura atividade treinamentu jornalizmu komprensivu ba faze dahaat ne'ebe prepara husi Konsellu Imprensa, inklui parseiru rua hanesan UNDP ho COICA iha edifisiu KI Kintal Boot, Dili, ohin.

Governante ne’e hato'o agradesimentu ba Konsellu Imprensa no UNDP inklui COICA, ne'ebe durante ne’e iha koperasaun diak tebes, bele konvida governu atu ko’alia oituan kona-ba polítika oinsa maka bele fasilita jornalista iha futuru.

"Koperasaun ne'ebé mak konsellu Imprensa halo ho UNDP no COICA ne'e diak tebes. Ida ne'e presiza ita kontinua ba oin. Lasu koperasaun ne'e tenke diak nafatin atu nune'e bele fó oportunidade ba jornalista sira hodi hetan formasaun diak liu tan iha futuru," MAPKOMS hateten.

Iha fatin hanesan, Diretor Ezekutivu, KI, Rigoberto Monteiro hateten, treinamentu jormalistiku ne'e realiza atu hasa’e jornalista sira nia Kuñesimentu no abilidade, liuliu jornalista foun sira ne'ebé daudaun ne'e serbisu iha midia online sira husi aspetu hotuhotu iha area jornalizmu.

Nia dehan, formasaun iha tinan ne'e diferente oituan ho tinan rua-liu ba, tanba formasaun Ida agora sei foka-liu ba jornalista midia online sira no realiza mos iha espasu no ambiente foun, tanba jornalista sira sei halo atividade oin-site visit iha area fronteriza atu halo kobertuta ba asuntu Covid-19.

"Treinamentu jornalizmu kompriensivu ne'e konta ho Ida-ne'e ba dahaat ona, iha-ne'ebe faze primeiru, segundu no terseiru hala' o iha 2018, 2019 no tinan ida-nee semana primeiru ita sei realiza iha Maliana- Munisipiu Bobonaro no Semana tolu seluk ita sei hala’o iha Kapital Dili. Fasilitador sira mai hosi Cl, UNDP no treindor parseiru internasional sira hanesan Australia, SEAPA Southeast Asia Press Alliance no Indonezia," nia informa.

Jornalista ne’ebé oras ne’e partisipa formasaun mak hanesan jornlista media online hamutuk 32 no antes ne’e, iha tinan rua ba kotuk jornalista hamutuk nain 162 Mak konsege hetan ona sertifikadu hosi treinamentu jornalizmu kompriensivu.

Kooperasaun ne'e inisia iha 2017, hahú ho treinamentu jornalizmu dahaluk ne'ebé foka-liu ba reportajen eleitoral.