“Ba ha’u atu hira-hira, ne’e laiha problema, maibe ita mós tenke iha kapasidade ezekusaun husi kada ministériu ka instituisaun. Labele ita tau orsamentu barak, kapasidade ezekusaun laiha. Entaun, ikus mai ba viájen lokál no estranjeiru mak barak liu", Júlio hateten ba jornalista iha Kampus Faspol, kuarta (28/10).
Nia esplika, kapasidade ezekusaun katak, oinsá governu uza osan ne’e atu bele iha benefisiu longu prazu, kurtu prazu, nomós ema bele sente dehan katak osan ne’e bele rezulta fali osan seluk.
"Kapasidade la signifika naran katak tenke ezekuta hotu, ne’e laloos. Ezekuta hotu ne’e, ema hotu tenke ezekuta hotu, maibé benefisiu tenke ba povu, no osan ne’e labele soe-soe de’it", nia subliña.
Nia mós konsidera OJE 2021 importante, tanba ne'e, bainhira iha planu orsamentu, governu labele haree de’it nia totálidade, maibé tenke ninia implemensaun, ezekusaun tenke responde duni ba povu.
"Keta halo ba mak orsamentu ne’e boot hanesan ne’e, maibé atu responde de’it asesór sira, deputadu sira, ministru sira no sekretáriu estadu sira, ida ne’e labele", nia rezeita.
Júlio la preukupa kona-ba montante orsamentu to'o fali billiaun $2 ka billiaun $3, maibé importante povu sente dehan orsamentu barak no sira mós tenke moris di’ak.
Nia mós husu ba deputadu sira iha PN atu haree no estuda didi’ak orsamentu ne'e, labele haree tanba de’it ministru ne'e mai husi partidu ida, depois hi'it kartaun matak halo ona aprovasaun.
Entretantu, Orsamentu Jerál Estadu (OJE) ba tinan 2021 nian ho montante hamutuk billiaun $1.8.