Somotxo rasik dezde uluk defende, hakarak implementa serbisu militár obrigatóriu, tanba Timor-Leste foin ukun aan liu husi funu naruk, tanba ne'e joven sira presija formasaun no edukasaun ida ba parte morál hanesan formasaun psikolojia no fízika, nu’ne’e, jovens sira dixiplina liutan.

"Dixiplina militár ne'e la'ós husu lai opiniaun. Maibé, kumpre no tenki kumpri. Tanba ne’e, sei forma joven sira fízikamente, psikolojikamente, tinan ida ba rua bele marka diferensa depois de ba fali vida sivil," Somotxo hateten ba www.tempotimor.com iha Parlamentu Nasionál Dili, Kinta (29/10).

Deputadu FRETILIN ne'e hatutan, dixiplina iha Militár assertivu tanba ne'e kuandu joven sira liu husi serbisu militár obrigatóriu sei simu formasaun ba des-araska moris iha situasaun difisil.

Somotxo hato'o parabéns ba VIII governu konstitusional ne'ebé aprova ona projetu dekretu governu nian kona-ba regulamentu foun husi lei serbisu militár ne'ebé aprezenta husi Ministru Defeza no Seguransa (MDS).

Antes ne'e, governu liu husi reuniaun konsellu ministru aprova ona dekretu regulamentu foun husi lei serbisu militár ho objetivu atu kompatibiliza inovasaun ne’ebé introdús iha estatutu militár foun F-FDTL nian, kona-ba rekrutamentu efetivu iha tempu pás ne’ebé adopta sistema serbisu militár obrigatóriu ba Jovens sira ho idade 18.

Nune'e tuir dadus sensus 2015 ne'ebé www.tempotimor.com asesu iha portal unicef hatudu katak, totál populasaun dadaun ne'e hamutuk 1.183.643 ne'ebé kategoria joven ho idade 18 hamutuk %46.4 iha teritóriu Timor-Leste.