Hafoin vizita ne'e, Ministru MAPKomS Francisco Gerónimo orgullu ba programa ne'ebé órgaun reguladór ba Komunikasaun Sosiál sira elabora, tanba ne'e kontinua fó atensaun ba programa ne'ebé implementa tiha ona.
Nia mós promete sei tau konsiderasaun no deskute oinsa buka solusaun ba preokupasun KI hanesan fatin ba KI inklui Balibo Five ne'ebe hanesan loron ba liberdade imprensa nian.
"Intensaun atu haree diretamente kondisaun edifísiu Konsellu Imprensa nian no ko'alia mós kona-ba kooperasaun serbisu entre MAPKomS ho órgaun reguladór komunikasaun sosiál ne'e iha futuru," dehan Ministru ne'e hafoin termina vizita kortezia ba KI, iha Kinta-Boot, Segunda (26/10).
Iha fatin hanesan, Prezidente KI, Virgílio Guterres, hato'o kondisaun reál KI nian ba MAPKomS, liu-liu kona-ba fatin sira iha aredór KI nian ne'ebé abandonadu hela. Tanba ne'e kontinua buka meius atu koopera ho ministeriu relevante sira liu-liu MAPKOMS hodi implementa atividade kona-ba literásia mediátika ho literásia dizitál.
"Ba oin sei diskute mós kona-ba nesesidade revizaun ha kuadru legál sira liu-liu Lei Komunikasaun Sosiál no Estatutu Konsellu Imprensa tanba KI identifika katak iha Lei Komunikasaun Sosiál la mensiona ho loloos plataforma mídia online," dehan nia.
Iha oportunidade ne'e, Konsellu Imprensaa husu ba MAPKOMS atu aprezenta iha reuniaun Konsellu Ministru hodi konsidera Balibó Five hanesan loron Liberdade Imprensa.
Entrentantu tuir planu iha futuru, Konsellu Imprensa mós sei tau prioridade ba Programa Dezenvolvimentu Mekanizmu Auto regulasaun no Supervizaun ba Mediasaun, iha ne'ebé sei servisu hamutuk ho MAPKOMS tanba programa ne'e foka liu ba revizaun lei no enkuadramentu legál sira inklui sensibilizasaun no konsulta kona-ba divulgasaun Lei Komsos nian ne'ebé aprezenta husi Diresaun Nasionál Diseminasaun Informasaun (DNDI).(*)