Diretór FONGTIL husu ne’e tanba konsidera ajénsia ne’e tuir loloos labele faan tiket iha tempu estadu emerjénsia ho folin $1.500.

Daniel Carmo ba www.tempotimor.com hateten, estadu emerjénsia ne'e limita liberdade movimentasaun internasionál, tanba ne'e pasajeiru sira tenke husu responsablidade ba ajénsia ne’ebé faan billete ne’e atu responsabiliza.

"Ita hatene katak iha estadu emerjénsia ne'e limita liberdade movimentasaun internasionál, la'ós de'it iha Timor, maibé nasaun seluk mós iha regra rigorozu, depois voo aviaun nian iha nasaun ida ba nasaun seluk ne'e iha problema. Tanba ne'e, ajénsia tenke responsabliza," Daniel ba www.tempotimor.com iha Palásiu Prezidensiál Bairru-pite, Dili, Segunda (26/10).

Ho aktu ne'ebé ajénsia Cammer PC halo ne'e, maka FONGTIL enkoraza sidadaun sira ne'ebé hola ona billete, katak, bainhira la responsabiliza tenke prosesa ajénsia tuir dalan legál.

"Ita enkoraza ita-nia sidadun sira atu prosesa ajénsia ida faan ticket ne'e, tanba iha buat ida ne'ebé ita bele dehan bosok ita-nia sidadaun sira, ita-nia sidadaun sira hola ne'e la sala, ajénsia mak sala, tanba iha estadu emerjénsia hela, faan ticket mós laiha koordenasaun ho Ministériu Transporte no Komunikasaun (MTK), derepente nia faan ticket, entaun tenke responsabliza," nia deklara.

Kona-ba ne’e, diretór ajensia Cammer PC Rui Pires iha Sábadu (24/10) hateten katak, osan ne'ebé atu aluga aviaun ne'e, estadu la tau sentavus ida.

"Ha'u triste loos, tanba ita uza Ita nia kosar been rasik, ita la foti estadu nia osan, ita aluga aviaun mós ita uza ita-nia osan, ita la husu dolar ida husi estadu," dehan diretór ajénsia ne'e bainhira kansela pasajeiru sira-nia viajen ba Inglatera.