Ministru ne'e dehan, programa ne'e sei realiza bainhira Orsamentu Jerál Estadu (OJE) tinan fiskál 2021 nian aprovadu.
"Orsamentu 2021 aprova ita mos bele hanoin koopera di'ak ba malu, tanba agora ha'u hatene katak media sira online no jornál ami fó opsaun para bele estabelese buat ida publisidade para iha parte ida pelumenus ajuda malu, mobiliza informasaun ba ema hotu-hotu", dehan Ministru Asuntu Parlamentár no Komunikasaun Sosiál (MAPKomS), Francisco Martins da Costa Pereira Jerónimo hafoin halo vizita ba AJTL iha Fatuhada, sesta (7/8).
Tuir nia, kontribuisaun média ba kombate pandemia Covid-19 mos makaas tebes, tan ne'e sei rezolve mos preokupasaun média nian atu bele fó sai informasaun kona-ba situasaun ne'ebé la'o.
Ministru dehan, governu liuhusi MAPKomS nafatin koopera ho média no entidade hotu-hotu ho prinsipiu atu servisu hamutuk hodi rezolve ka dezenvolvimentu buat ne'ebé presiza.
"Governu nafatin koopera ho média hotuhotu ho entidade sira iha área komunikasaun sosiál nian, governu mai ho prinsipiu hakarak atu haree saida mak ita presiza halo no saida mak ita presiza hadi'a entaun, ita bele hadi'a hamutuk hodi dezenvolve nasaun ne'e, liuliu dezenvolve informasaun ne'ebé di'ak", tenik ministru. (*)