Prezidente Komisaun Organizador FALINTIL Tours, Xefe Estadu Maiór F-FDTL, Koronel Calistro dos Santos 'Coliati' hateten, komemorasaun ba loron FALINTIL ba dala XL iha programa haat ne'ebé importante.

"Serimónia komemorasaun no tour haleu munisípiu 12, ne'ebé ohin, Sábadu (08/08) hahú no sei remata iha (13/08) iha Dili, iha 18 Agostu sei halo semináriu ida ne'ebé espesífiku kona-ba defeza marítima no autoriedade marítima, iha 19 Agostu sei iha misa agradesimentu no iha 20 Agostu iha serimónia parada ba komemorasaun tinan XL FALINTIL nian," dehan nia, ba jornalista sira iha Kuartél Jerál Fatuhada Dili, Sábadu (08/08).

Hodi hahú jornada haleu munisípiu 12 ne'e Koronel Coliati husu forsa sira atu dixiplina.

Iha fatin hanesan, Xefe Estadu Maiór Jenerál F-FDTL, Maijór Jenerál Lere Anan Timur, fiar tour ne'e sei susesu, tanba matebian sira sempre tulun.

"Ha'u-nia mensajem ba imi katak, ita-nia tour ida ne'e, sei susesu," haktuir Lere.

Lere garante, ekipa sira ne'ebé envolve iha jornada haleu munisípiu sei la hetan dezastre.

"Imi sei la hetan azar ka susar ruma, tanba imi-nia aman, imi-nia maun sira ne'ebé agora la hamutuk ita, balun agora iha Metinaru ne'ebá, balun imi sei tau ai-funan iha dalan. Sira sei la'o ho imi, sei proteje imi husi susar hotu-hotu, entaun loron 13 imi sei to'o iha ne'e ho kompletu, isin di'ak no saúde di'ak," Lere tenik.

Lider F-FDTL ne'e husu ba forsa hotu katak, iha jornada nia latan tenke hatudu aan hanesan ema povu nia oan, tanba mai husi povu. (*)