Aportil sei Implementa Masimu Regra Prevensaun Covid-19 iha Portu

Portu Dili Portu Dili Foto Suplai

Tempotimor (Dili)-Relasiona ho implementasaun Estadu Emerjensia dahaat, Autoridade Portuariu Timor-Leste (Aportil) sei implementa ho masimu regra prevensaun Covid-19 ne’ebé Ministériu Saúde no Organizasaun Mundia Saúde fó sai ona.

Prezidente Aportil, Flávio Cardoso Neves hatete, atividade ne'ebé la’o durante EE iha portu, tantu importasaun no esportasaun, inklui viajen pasajeiru sira ba Oekusse no Autauro sei mantein ho estandarte ne’ebé Ministeiru Saude no Organizasaun Mundial Saúde fó sai.

"Aportil tenta masimu nafatin ho Ministeiru Saúde atu implementa regras ne'ebé sira iha, koordena mos ho Imigrasaun tanba ita hatene dala-ruma ema estranjeiru balun tama husi portaun Oekusse mai Dili,” dehan Flávio iha nia knar fatin, Farol, Sesta (07/08).

Ba aplikasaun EE dahaat, Flávio dehan, atividade iha portu kontinua la’o normal, no nafatin halo kontrolu masimu ba movimentu ro, pasajeiru no sasan.

"Ita-nia estadu emerjensia ne'e haree liu ba fronteira, entaun ita haree liu-liu ba sasan i ema sira tama ne'ebé mai husi Internasional i nasional, ita mós fó atensaun maka’as ba sidadaun sira ne'ebé hala’o viajen Dili-Oekusse i Atauro," dehan Flávio.

Flavio informa, durante ne’e sasan hirak ne’ebé tama husi rai li’ur barak liu mak foos, supermie, bee-hemu, no material konstrusaun sira.

"Durante estadu emergensia ita buka atu fasilita sira nune'e sasan sira ne'e bele tama i sai ho lalais," dehan Flávio.

Entretantu, iha Kuarta (05/08) kalan, Prezidente Repúblika Francisco Guterres Lu Olo deklara estadu emerjensia dahaat, ne’ebé hahú aplika iha 6 Agostu no sei remata iha 5 Setembru 2020.

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.