Governu Anterior Sosa Trator Halo 'Besi Tua' Hatodan MAP

Trator ne'ebe governu sosa sai besi tua Trator ne'ebe governu sosa sai besi tua Foto Suplai

TempoTimor (Dili) - Ministru Agrikultura e Peska, Pedro dos Reis hasoru malu ho PM Taur Matan Ruak iha Palasiu do Governu. Hafoin enkontru hotu, ba Jornalista sira, Pedro ko'alia kona ba seguransa Alimentar vs reabilitasaun sistema irigasaun no trator sira ne'ebe uluk IV Governu Konstitusional sosa hodi halo besi a'at iha TL.

Natar barak iha municipiu sira iha Timor Leste abandonadu maske dala barak mosu projeitu hadi'a irigasaun, fahe fini no seluk tan. Maske gasta osan estadu maibe kada tinan Governu Timor Leste la falta importa fos husi nasaun seluk iha azia liu-liu Thailandia no Vietnam.

Relasiona ho trator sira ne'ebé uluk IV governu konstituisional sosa hodi fahe gratuita ba populasaun agrikultura, Ministru Agrikultura no Peskas (MAP) Pedro dos Reis informa, trator hirak ne'e to'o agora barak mak aat ona tanba ne'e hanesan problema.

Tuir Nia, trator sira ne'ebé aat ona sei halo de'it manutensaun ba kustu ki'ik maibé sira ne'ebé kustu bo'ot sei la halo manutensaun.

"Trator ne'e mak problema agora kuaze aat hotu, ezemplu hanesan betanu iha 36 unidades diak hela 5 ou 6 de'it, ami so halo manutensaun ba ida ne'ebé kustu ki'ik, maibé ida ne'ebé boot hanesan de'it tanba ita hatene trator ninia servisu ne'e todan hanesan fila rai, tanba ne'e ita halo manutensaun ba ida ki'ik ne'e buat ketak ida, maibé ida boot ne'e manutensaun hotu tama ba mak aat fali oinsa, tanba ne'e ami la'o ho buat ne'ebé iha", informa Nia hafoin hasoru-malu ho Primeiru Ministru Taur Matan Ruak iha palasiu governu, sesta (07/08).

 

<iframe width="560" height="315" src="/" frameborder="0" allow="accelerometer; autoplay; encrypted-media; gyroscope; picture-in-picture" allowfullscreen></iframe>

 

Tuir planu atu fa'an ka lelaun ba trator sira ne'ebé uluk governu fahe maibé susar ituan tanba, kustu boot no balun kondisaun aat entaun ema sei la sosa.

"Agora atu fa'an mos ema lakohi hola ida tanba, nia kustu boot ida ne'e mak problema mas ita mos propoin atu hola trator ne'e imposivel tanba, trator sira ne'ebé iha hadi'a labele, atu hola tan halo saida, tan ne'e ho ami nia prezensa ne'e koko utiliza sasan ne'ebé iha ho masimu par depois bele hatudu rezultadu, ida ne'e mak ami bele halo",tenik Nia

Trator sira ne'e governu sosa maibé la uza entaun, barak mak aat ona tan ne'e, MAP sei la iha planu atu sosa tan trator, so iha de'it mak planu atu sosa tronton par bele kobre iha Timor laran.

"Atu sosa foun ne'e imposivel maibé, ami propoin karik bele hola tan mak tronton tanba eskavador aat hotu kala hela de'it unidade rua ou tolu atu kobre timor laran labele tanba ne'e, ami propoin atu hola tronton atu nune'e fatin ne'ebé mak husu ita haruka ba kedan", Nia esplika

Nia hatutan, atu sosa tan tronton ne'e tanba, dadaun ne'e hela ki'ik ida no boot ida.

"Agora ami nia tronton iha maibé, ida ki'ik no ida boot, se tronton ita hatene tula makina ne'e boot, ita haruka kondutor sira atu lalin entaun ita haruka kondutor sira ba mate, tanba ne'e mak agora propoin hela",Nia sublina

Kona-ba lista trator hira mak fahe ba Timor laran tomak, parte Nia, sidauk hatene maibé nia rekoinese katak, trator barak tanba ne'e, barak mak aat ona entaun tenta par uza masimu no kontrola ba balun ne'ebé sei diak.

"Trator barak hau la dun lembra ona maibé, tuir hau nia vizita haree hanesan iha suai hamutuk 38 maibé funsiona ne'e kala hela 6 de'it, iha betanu 36 funsiona kala 4 de'it, iha barak maibé hau sidauk hatene loloos ninia unidade maibé, sira ne'ebé funsiona ne'e koko par uza ho masimu. Hau sidauk hatene lista trator nian tanba barak, imi hatene trator de'it uluk iha timor laran nakonu", Nia relata

Antes ne'e, iha tinan 2007-2008 IV governu konstituisional liu husi Ministériu Agrikultura no Peska (MAP) ne'ebé lidera husi Mariano Asanami Sabino hamosu programa sosa trator hamutuk 300 no trator ne'ebé uza liman hamutuk 2.250 hodi fahe ba agrikultura sira par bele hasa'e produsaun agrikula.

Rate this item
(0 votes)
Last modified on Friday, 07 August 2020 22:23
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.