PM Taur: MSSI mak Responsabiliza Uma-kain ne’ebé Seidauk Simu Subsidiu

Komunidade forma hodi simu subsidiu iha suku ida iha Dili Komunidade forma hodi simu subsidiu iha suku ida iha Dili Foto File Tempo Timor

Tempotimor (Dili)-Primeiru Ministru Taur Matan Ruak deklara katak Ministériu Solidariedade Sosial no Inkluzaun (MSSI) mak responsabiliza uma-kain sira ne’ebé sira-nia naran laiha lista pagamentu subsidiu $100.

PM Taur hatete, MSSI ne’ebé lidera husi Armanda Berta tenke buka hatene tanba saida mak uma-kain balun nia naran la tama iha lista pagamentu.

"Sira ne'ebé seidauk simu subsídiu ne'e sira (MSSI) tenke hatene, tanba saida mak sira seidauk simu. Tanba ne'e responsabilidade iha MSSI. Entaun sira (MSSI) sei tenta hodi kontaktu par tékniku sira haree tanba saida mak sira (uma-kain) la simu, ne'e sempre iha razaun," dehan PM Taur iha Palásiu Prezidensiál Bairu-pite Dili, Kinta (25/06).

Iha oportunidade ne’e, Xefe Governu mós informa katak, prosesu pagamentu subsidiu $100 ba kada uma-kain iha TL, besik remata ona.

"Kona-ba prosesu pagamentu ba benefisiáriu ka komunidade sira besik hotu ona, so iha Dili mak seidauk, espera katak loron ida ka rua hanesan ne'e bele hotu," dehan PM Taur.

Entretantu, tuir planu governu, pagamentu subsídiu $100 ba uma-kain hala’o iha loron 14 nia laran, hahú iha 09 Juñu 2020 to’o 24 Juñu 2020, maibé realidade to’o iha 25 Juñu prosesu pagamentu seidauk remata.

Maibe iha aldeia balun iha Dili laran no familia balun iha aldeias sira iha interior seida'uk simu subsidiu refere.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.