Agradesimentu ne’e PM Taur hato’o bainhira hala’o enkontru semanal ho Xefe Estadu iha palasiu prezidensial Nicolau Lobato, Kinta (25/06).
"Ha'u mai agradese ba sua eselénsia Prezidente Repúblika tanba fó pose ba governu no ikus mai governu kompleta nia elenmentu governamentais ho kbiit hodi hala'o serbisu ne'ebé presiza halo iha tempu oin mai," dehan PM Taur.
Xefe governu ne’e hatutan, nia mós sente kontente tanba membru governu kompletu ona.
"Ha'u kontente loos, tanba ha'u-nia ekipa kompletu. Imi hatene eeh… durante tinan rua ha'u la'o ho roda tolu de'it, maibé primeira vez ho roda haat ona, entaun ne'e di'ak no ha'u kontente loos," nia dehan.
PM Taur espera katak ho estrutura ne’ebé kompletu ona, governu ne’ebé nia lidera bele halo serbisu di’ak liu tan.
"Ha'u kontente no espera katak ho ekipa ida ne'e bele halo esforsu par presta serbisu ba ita-nia sidadaun sira, ho mákina estadu ninia lala'ok, tenta infrenta situasaun moras, ekonomia, problema sosiál," nia dehan.
