Hotel ne'e akumula Timor-oan na'in 34 ne'ebé fila husi rai li'ur no na'in rua seluk nu'udar pesoal saúde ne'ebé akompaña sira. Ema na'in 36 ne'e fahe ba kuartu 16, kada kuartu selu $45 kada loron. Signifika iha loron ida governu hasai $720 ba ema na'in 36 ne'e.

Aleinde aluga kuartu, governu mós selu osan haan nian. Osan ne'ebé hasai ba ema ida haan dala ida mak $3.16 sentavus, signifika iha loron ida sura haan dala tolu, selu ho osan $9.50 sentavus ba ema ida.

Timor-oan na'in 36 ne'e hela iha Hotel Leokasi durante loron 23, signigika governu hasai osan hamutuk $16,560 selu kuartu, no osan hamutuk $7,866 hodi selu hahaan.

Jestor Hotel Leokase, Marciana dos Reis Soares hatete, kustu aluga kuartu loloos ho valor $50, maibé sira hamenus ba $45.

"Kona-ba kontratu iha ne'e primeiru ami fo $50 dollar, maibé komu ita Timor-oan hotu entaun hatun ba $45 dollar kada kuartu ida iha loron ida, sira iha ne'e hamutuk nain 34 no ho pesoal saúde na'in 2 entaun sira hamutuk 36 pesoas," dehan nia iha Hotel Leokase, Rai-kotu, Sesta (24/04).

Nia dehan, kontratu ne'ebé halo la'os ba kada ema maibé ba kada kuartu, tanba kuartu balun luan nune'e bele akumula ema na'in 3 to'o na'in 4.

"Sira iha ne'e durante loron 23 sura husi loron tama iha loron 2 fulan Abril to'o mai horseik, 23 Abril," dehan nia.

Kona-ba hahaan, Jestor ne'e dehan, kada loron, kada ema ne'ebé hela iha kuarentena han dala tolu ho valor osan $9.50 sentavus.

"Hahan ba sira ami mak halo tratamentu ba sira, kada loron ida dala tolu, dader, meudia no kalan i sira iha ne'e ema ida han $ 9.50, maibe ne'e la sura ho $45 ne'e, hahan nian sura ketak no selu kuartu ketak."

Entretantu, hafoin kuarentena durante loron 23, iha Sesta (24/04), Timor-oan hirak ne'e bele livre ona hodi fila ba idaidak nia hela fatin.

Diretor Unidade Apoiu Juridiku Ministeriu Saude Belarmino da Silva informa, sira ne'ebé ohin livre husi kuarentina obrigatoriu iha Dili hamutuk na'in 51 kompostu husi Hotel Leokase na'in 34 no Otel Jonty na'in 17.

Diretor ne'e dehan, Timor-oan na'in 34 ne'ebé tama iha kuarentina obrigatoriu Hotel Leokase hahú husi 2 Abril, kompostu husi feto na'in 15 no mane na'in 19.

"Loloos sira kompleta loron 14 iha kuarentina iha loron 17 fulan Abril, maibé tanba iha asuntu balun ne'ebé sira presiza kompleta hanesan hatudu sintomas isin-manas, mear no inus-metin, entaun extende tan hodi hasai sample hodi halo ezame teste no rezultadu negativu, entaun ohin mak sira foin livre ba uma," dehan nia.