Adriano: "Di'ak liu Lakon Pozisaun Duke Halakon Sensibildade Ba Nasaun ho Povu"

Lideransa Partidu Demokratiku iha momentu halo desizaun koligasaun ho CNRT, iha sede Partidu Demokratiku Kolmera Dili (21/2) Lideransa Partidu Demokratiku iha momentu halo desizaun koligasaun ho CNRT, iha sede Partidu Demokratiku Kolmera Dili (21/2) Foto arkiviu

Tempotimor (Dili)-Deputadu Bankada Partidu Demokratiku Adriano do Nascimento la tauk lakon pozisaun bainhira parte seluk husu nia halakon nia sensibilidade atu defende interese nasaun no povu nian.

Deklarasaun ne'e deputadu Adriano fó sai relasiona ho ezijensia husi Sekretariu Jeral Juventude Demokratiku Munisipiu Dili (JDMD), Cesar Mau-Loi, ba Prezidente no Sekretariu Jeral PD atu foti medidas ba atetude deputadu Adriano tuir estatutu partidu nian no tuir lei eleitoral.

Ba deklarasaun husi Mau-Loi, Adriano hatete, to'o ohin loron nia seidauk vota kontra programa no politika koligasaun foun ne'ebé PD mós hola parte iha laran, tanba Primeiru Ministru foun seidauk iha.

Nia dehan, nu'udar deputadu nia vota a favor atu diskuti proposta governu konstitusional daualu ho karater urijensia tanba dezde ezistensia governu konstitusional daualu deputadu PD sira sempre vota a favor.

"Ha'u vota a favor tanba dezde oitavo governu ne'e mosu, ha'u-nia prezidente PD Mariano Asanami Sabino, Sekretariu Jeral PD Antonio da Conceicao 'Kalohan' no Deputada Elvina Sousa sempre vota a favor ba politika oitavo governu nian, tanba PD sein rezerva ba estadu ne'e, entaun ha'u vota a favor ba politika oitavo governu nian ne'e problema saida no disiplina saida mak ha'u kontra?."

"Se dezde hahú sira nain tolu vota a favor, ha'u mak vota kontra hela de'it, agora dadauk tan de'it Covid-19 no hadi'a povu nia uma ha'u vota a favor ne'e ha'u mak sala fali?", dehan Adriano ba www.tempotimor.com liu husi telefone, Tersa (07/04).

Deputadu ne'e hatete, nia apresia ho kestaun ne'ebé Sekjer JDMD foti, tanba PD iha ema ho ideia diferente hodi koalia no kritika malu, maibé JDMD mós tenke respeita direitu ema ida-idak nian.

"Maibé sira mós tenke respeita ha'u-nia direitu, tanba PD hanorin malu katak ba intrese Estadu no povu PD laiha rezerva. Se sira atu hasai tanba defende povu ha'u prontu, tanba deputadu ne'e iha papel rua, ida serbisu ba partidu no seluk serbisu ba nasaun no povu," dehan Adriano.

Adriano afirma, bainhira nia serbisu ba povu mak PD deside hasai, nia prontu. Nia so moe bainhira hasai tanba kazu korrupsaun.

"Ha'u serbisu ba povu mak PD hasai, ha'u prontu simu, ha'u moe no tauk kuandu ha'u halo korrupsaun mak PD hasai ha'u," dehan nia.

Nia hatete, partidu bele foti desizaun hodi hasai nia husi estrutura partidu, maibé atu hasai husi pozisaun nu'udar reprezentante povu, sei presiza prosesu lai.

"Bele hasai ha'u husi PD no husi deputadu, maibé hasai ha'u husi deputadu ita sei prosesu lai, halo votasaun maioria aseita mak hasai ha'u no dalan ikus tribunal tenke deside ha'u sala saida," dehan nia.

Molok ne'e, liu husi konferensia imprensa iha Sede Nasionál PD, Sekjer JDMD, Cesar Mau-Loi kestiona pozisaun deputadu Adriano nian iha Parlamentu Nasionál.

Tuir nia, deputadu Adriano la tuir desizaun koletivu PD nian.

Mau-Loi dehan, deputadu ne'e hatudu inkonsistensia, tanba antes ne'e vota kontra hela programa no orsamentu jeral estadu governu nian, maibé derrepente vota a favor ba governu ne'ebé deminsionar ona.

Ho atetude ne'e, nia husu ba Prezidente PD no Sekretariu Jeral PD atu foti medidas ba atetude deputadu ne'e tuir estatutu partidu nian no tuir lei eleitoral kona-ba recall.

Mau-Loi ezije mós ba prezidente bankada PD iha PN, atu kontrola no fó xamada ba deputadu PD ne'ebé indisiplinadu.

Rate this item
(1 Vote)
Last modified on Tuesday, 07 April 2020 18:44
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com