“Ha'u ejize filafali ba Governu atu fó solusaun ba problema eis-traballadór husi kompaña Guarda Lorosa'e, distintu deputadu hotu hatene katak problema ida ne'e kleur tebes, e haree ba importánsia husi solusaun ba problema ida-ne'e nomós haree ba diretu husi eis-traballadór Guarda Lorosa'e ne'ebé mak nia diretu prezudikadu”, dehan Deputada Elvina iha plenária PN, tersa (05/07).

Tanba diretu eis-traballadór Lorosa'e ne'e rasik Parlamentu Nasionál asegura hela ho rezolusaun, iha ne'ebé rezolusaun ne'e rasik aprova no haruka ba Governu kleur ona maibé kontinua la rezolve.

Bainhira rezolusaun ida-ne'e aprova iha Parlamentu ne'e Ministru Obras Públika atual Abel da Silva Pires momentu ne'eba sei asume hela kargu hanesan Prezidente ba Komisaun E (ne'ebé trata Infraestrutura) iha ne'ebé nia mós hatene klean liu problema husi Guarda Lorosa'e sira-nian.

Tanba ne'e, PD hanoin katak agora ne'e momentu oportunu ida ba Ministru Abel Pires atu fó solusaun ba problema ida-ne'e.

“Ita hotu hatene katak Parlamentu Nasionál rasik hasai ona rezolusaun para husu Governu atu fó solusaun maibé to'o agora seidauk iha solusaun ida ne'ebé favoravel ba problema ida-ne'e”, afirma nia.

Maibé Bankada PD mós husu Ministru Obras Públika, Abel Pires atu buka mós solusaun ba projetu 143 ne'ebé mak hetan ona verifikasaun no identifikasaun nomos iha ona pagamentu balun.

“Projetu 143 ne'e e pakote projetu ne'e ita bele dehan problema ida ke kleur tebes e ha'u hanoin katak hanesan ohin ha'u hatete senor Ministru Obras Públika hanesan mós Prezidente Komisaun E ne'ebé mós hatene di'ak liu kona-ba problema ou pakote projetu 143, e ha'u hatene katak Komisaun E rasik hamutuk ho Ministériu Obras Públika la'o hodi verifika no haree ho matan projetu sira ne'e”, esplika nia.

Ba preokusau ida-ne'e Bankada PD mós hein ekipa entre MOP ho PN ne'ebé momentu ne'eba la'o hamutuk hodi tun ba verifika no haree ho matan ba projeu sira ne'e bele fó ona solusaun ba problema refere.

“Ita hotu hatene katak setór privadu ou kompaña privadu ne'e sai hanesan parseiru dezenvolvimentu husi Governu, ho ida-ne'e mak husu atu Governu liliu Ministru MOP fó solusaun ba kompaña sira ne'e”, dehan nia. (*)