Konsiderasaun ne'e mosu tanba, CNRT ho nia aliadu sira husu governu atu tau hela rihun $500 iha PN hodi halo polítika no dezenvolvimentu atu hetan lukru.
"Agora kria fali fundu ida no membru governu CNRT mak jere, ne'e aproveita situasaun emerjénsia para hetan projeitu, ida ne'e hatudu momós katak hamosu proposta ida ba interese partidária," dehan deputadu FRETILIN Aniceto Longuinhos Guterres iha plenária PN, Kinta (02/04).
Iha fatin hanesan deputada PLP Maria Angelina Sarmento hateten, tau osan rihun $500 iha PN, parte ida hadau ezekutivu nia servisu.
"Iha artigu 2 a númeru 2 ne'ebé atribui tan rihun $500 ba PN atu halo programa no polítika. Ha'u hanoin asaun ida ne'e ita interven iha kompeténsia ezekutivu nian. Ne'e ha'u bele halo konkluzaun katak, ita mós hakarak hetan lukru iha situasaun emerjénsia," Angelina dehan.
Hatán ba kestaun ne'e, prezidente bankada CNRT Duarte Nunes hateten, kria fundu ne'e tanba osan povu nian.
"Ami hanoin kria fundu ne'e tanba osan povu nian, ita na'in 65 ne'e reprezenta povu, tanba ne'e osan povu nian ne'e tenke tau klaru mak responsavel bele foti, ida ne'e mak ami hakarak, la'ós ba tau iha karon mak ida-idak ba sukit," dehan Duarte.
Nune'e mós deputadu CNRT Adérito Hugo da Costa reforsa katak, tau osan rihun $500 ne'e atu parlamentu mós halo akompañamentu efetivu iha situasaun ne'e, tanba PN mak autoriza Prezidente Repúblika (PR) deklara estadu emerjénsia.
Maski deputadu sira husi bankada FRETILIN ho PLP sujere osan ne'e fila ba governu, maibé ikus mai deputadu husi CNRT ho aliadu sira aprova duni hodi tama ba PN.
Proposta ne'ebé hetan aprovasaun mak artigu 2a númeru 2 ne'ebé atribui osan rihun $500 mai PN hodi halo programa no politika dezenvolvimentu.
Votasaun ba proposta ne'e a favór 36 kontra 28 no abstensaun ida, nune'e proposta ne'e fó dalan atu osan rihun $500 tama iha PN.