Tuir Duarte, desizaun husi partidu rua ne'e, tantu asina de'it entendimentu ida ka forma aliansa ida, la kontra lei.

"FRETILIN ho PLP asina akta entendimentu ne'e ema (sira) nia direitu, atu halai ou la'o hamutuk ba ukun ne'e ema-nia direitu, ne'ebé ne'e la kontra Lei, atu halo entendimentu ka koligasaun ne'e ida-idak nia direitu," dehan Duarte iha PN, Tersa (24/03).

Nia hatete, FRETILIN ho PLP bele hamutuk ba ukun, maibé ninia implikasaun mak koligasaun ne'ebé lidera husi CNRT iha ona kadeira 34 no koligasaun foun ne'e ho de'it kadeira 31.

"Koligasaun foun ida iha ona ho kadeira 34, Prezidente Republika seidauk deside atu ba forma governu, agora mosu tan koligasaun ida ho kadeira 31 de'it," dehan nia.

Maske nune'e, Duarte hatete, nia parte hein de'it desizaun husi Prezidente Repúblika. Bainhira desizaun refere tuir lei, CNRT sei simu, maibé se la tuir lei, CNRT sei lori ba tribunal.

Tuir nia, tempu ona atu PR Lu Olo hodi deside fó ba koligasaun ida ne'ebé mak atu ba kaer ukun.

"Se Prezidente Republika fó ba minoria, FRETILIN ho PLP, ita sei haree, tanba iha esperensia 2017 fó ba minoria ukun monu iha dalan, se Prezidente Republika hakarak fó ba minoria signifika hakarak Eleisaun Antesipada, tanba ita ko'alia ida, hahalok hatudu buat seluk, ne'e mak problema."

Entretantu, koligasaun entre CNRT, PD, KHUNTO, PUDD, UDT no FM asina ona akta koligasaun iha dia 22 Fevereiru, no iha 21 Marsu, FRETILIN no PLP asina akta entendimentu.