"Tuir Loloos iha situasaun hanesan ne'e maun boot (Xanana) mos partisipa hodi tau hamutuk hanoin, hodi kombate virus ne'e. La'ós tan de'it diferensa hanoin polítika e hadau malu pozisaun hodi halo sira se kotuk ba malu," dehan Manuel da Costa, komunidade ida iha Komoro.
Nia akresenta, Taur, Lú Olo ho Xanana loloos hatudu laran di'ak buka tuur hamutuk atu tau hamutuk hanoin sosa ai-moruk husi Xina hanesan Prezidente Jokowi halo hodi prepara tulun povu moris nafatin para sira ukun. See lae virus mai oho povu barak entaun sira nia ukun mos la folin.
Tuir nota ba imprensa ne’ebe fo sai husi gabinete Prezidente Repúblika, membru Konsellu Estadu ne’ebé sei partisipa iha reuniaun ne’e mak Prezidente Repúblika, Francisco Guterres Lú Olo, Primeiru Ministru, Taur Matan Ruak, Eis Prezidente Repúblika sira (Kay Rala Xanana Gusmão no Jose Ramos Horta), Prezidente Parlamentu Nasionál Arão Noe, no membru ne’ebé nomea husi Prezidente Repúblika: Óscar Lima, Alcino de Araújo Barris, Maria Dadi Soares Magno, Laura Soares Abrantes, Faustino da Costa no nomeia husi Parlamentu Nasionál: Eduardo de Deus Dusae, Aurora Ximenes, José Cornelio Guterres, Arcângelo de Jesus Gouveia Leite, José dos Santos ‘Naimori Bucar’.
Tuir observasaun, membru Konsellu Estadu hotu-hotu marka prezensa inklui eis-Prezidente Republika, Jose Ramos Horta, maibe úniku eis-Prezidente Repúblika, Kay Rala Xanana Gusmao maka auzente. (*)