Remata enkontru Konsellu Defeza no Seguransa inklui Konsellu Estadu, Xefe Kaza Sivíl Prezidensiál, Francisco Maria de Vasconcelos hateten, tarde liu aban Prezidente sei haruka karta ba Parlamentu Nasionál 0patu husu autorizasaun.
"Tenta ohin haruka ba Parlamentu Nasionál tanba ne'e urjente. Kleur liu mak aban," dehan nia, iha Palásiu Prezidensiál, Bairru-Pité, Tersa (24/3).
Estadu Emerjénsia signifika sei iha medida ne’ebé sei limita ka supende direitu balun liberdade balun no garantia balun ne’ebé Konstituisaun fó ba sidadaun sira. Governu hanoin katak ho medida sira ne’e mak bele kombate no hamenus moras ne’e da'et husi ema ba ema iha Timor-Leste.
Governu propoin ona períodu fulan ida ba Estadu Emerjénsia.
Partisipa reuniuan Konsellu Estadu ne’e maka Prezidente Repúblika, Francisco Guterres Lú Olo, Primeiru Ministru, Taur Matan Ruak, Eis Prezidente Repúblika sira (Kay Rala Xanana Gusmão no Jose Ramos Horta), Prezidente Parlamentu Nasionál Arão Noe, no membru ne’ebé nomea husi Prezidente Repúblika: Óscar Lima, Alcino de Araújo Barris, Maria Dadi Soares Magno, Laura Soares Abrantes, Faustino da Costa no nomeia husi Parlamentu Nasionál: Eduardo de Deus Dusae, Aurora Ximenes, José Cornelio Guterres, Arcângelo de Jesus Gouveia Leite, José dos Santos ‘Naimori' Bucar.(*)
