Danu ne’e halakon moris no halakon sasán barak, nune’e mos Konsellu Ministru halo análiza ba medida sira ne’ebé nesesária hodi bele rekupera iha tempu badak.
Medida ne’ebé Konsellu Ministru foti ba tempu badak, mediu no tempu naruk, por enkuantu preokupasaun dahuluk maka fó apoiu emerjénsia sira.
Hafoin ida ne’e, sei ba iha faze rekuperasaun, pois iha faze normalizasaun iha tempu naruk ne’ebé mos iha komponente prevensaun atu futuru labele akontese tan.
"Konsellu Ministru deside fó toleránsia durante loron rua, hahú husi loron 17 to’o 18 Marsu 2020. Iha loron ne'e hotu-hotu partisipa iha asaun limpeza no rekuperasaun ba estragu sira ne’ebé provoka husi inundasaun ne’ebé akontese iha Sesta (13/3)", dehan Ministru Reforma Lejizlativu Asuntu Parlamentár (MRLAP), Fidelis Magalhães, hafoin reuniaun Konsellu Ministru estraordinariu, iha Palásiu Governu, Segunda (16/3).
Toleránsia pontu ne’e aplika de’it ba Munisípiu Dili. Loron ne’e la’ós feriadu no la aplika ba funsionáriu sira ne’ebé presta fó serbisu esensiál sira, hanesan sira ne’ebé serbisu fó seguransa, tau matan ba área saúde, no protesaun sivíl.
Servisu esensiál kontinua no labele paradu. Ministériu sira mak sei define serbisu ne’ebé konsidera esensiál atu mákina estadu labele para.
Nune'e, funsionáriu sira ne’ebé halo serbisu esensiál tenke asegura sira-nia telemovel funsiona. Tenke asegura katak bainhira ministériu presiza bele kontakta sira.
Tanba ne'e, husu funsionáriu sira atu halo esforsu hotu iha uma hodi rekupera estragu iha uma no bairru, no atu kontinua nafatin mós evita atu Coronavírus la hada’et. (*)
