"Ita kuandu ba serimonia ne'e lori kilat ka lae? Ita kuandu hemu tua nee kilat ita tau nafatin iha bolsu ga lae? Buat sira hanesan nenee regras báziku ke forsa sira tenke hatene para evita kazu sira hanesan ne'e", dehan PM Taur, iha Palasiu Prezidensial, Bairru-Pite, Kinta (22/11).
Governu kondena makaas asaun ne'ebe pesoal membru PNTL ne'e halo ho hamate joven na'in tolu no hakanek na'in lima, iha Kukuhun. Nune'e hatoo mos sentidu kondolensias ba familia matebian sira.
Governu kompromete atu servisu hamutuk ho instituisoens PNTL no F-FDTL atu akontesimentu hanesan labele repete tan iha futuru.
Haree ba kazu ne'e, Xefe Governu rasik la fiar katak arguidu JPA mak tiru, tanba haree ninia komportamentu iha Komisaun 12 Novembru diak tebes.
Maski nune'e, nia bolu atensaun ba sira ne'ebe sei moris atu aprende husi akontesimentu ne'e.