Deputadu Bankada FRETILIN, Fabião de Oliveira hatete, Prezidente Autoridade RAEOA hala'o serbisu la hela permanente iha Oekusi, maibé hela fali iha Dili.
"Karik laiha kapasidade atu ukun iha Oekusi, rezigna aan ka sai ema seluk ba tama fali, tanba povu Oekusi iha ne'ebá loron-loron ezije beibeik prezensa Prezidente Autoridade nian", dehan nia, iha Uma Fukun Parlamentu Nasionál, Segunda (10/2).
Tuir fiskalizasaun deputadu Fabião, deteta Prezidente Autoridade nia-pozisaun iha RAEOA la permanente iha ne'eba. Hela iha Dili depois ba Oekusi loron ida rua fila-fali mai Dili, asesór sira mak hela metin iha Oekusi.
Nune'e, deputadu ne'e husu ba governu atu tau atensaun ba asuntu ne'e, tanba povu Oekusi hein hela prezensa Prezidente Autoridade nian.
Antes ne'e, funsionáriu RAEOA labele simu osan tanba Prezidente Autoridade RAEOA laiha Oekusi hodi bele asina lista pagamentu. (*)