"Maun boot la prezensa iha diálogu, maibé la signifika lakohi kontribui. Importante mak komunikasaun entre Prezidente Repúblika ho maun Xanana di'ak, ha'u fiar katak sei kontribui nia-hanoin ruma para buka solusaun ba impase atuál", dehan Prezidente Bankada CNRT, Duarte Nunes, iha Uma Fukun Parlamentu Nasionál, Segunda (10/2).
Nune'e, nia dehan, iha konstituisaun mós garante katak, Prezidente Repúblika bele konsulta ho órgaun Estadu nian ne'ebe hatúr ona iha Konstituisaun RDTL.
"Maun Xanana laiha la signifika lakohi partisipa diálogu. Ha'u fiar katak, nia hanesan sidadaun buka kontribui nafatin dezde Prezidente Repúblika fó oportunidade ba situasaun ida ne'e", tenik nia.
Situasaun ne'e espera liuhusi diálogu ne'ebé daudaun la'o hela, loron ida-rua tan bele iha ona solusaun ruma.
Kona-ba karta Prezidente Partidu CNRT, Kay Rala Xanana Gusmão ba Prezidente Repúblika, Bankada CNRT laiha koñesimentu ruma tanba ne'e liuhusi partidu.
"Karta ha'u la haree tanba la liuhusi ne'e, liuhusi partidu karik? Ha'u labele komenta, tanba ha'u la haree", dehan Duarte.
Ne'e duni, espera iha komunikasaun di'ak ho eis-Primeiru Ministru Xanana Gusmão, fiar katak sei kontribui para bele hetan solusaun. (*)