Tempotimor (Dili) - Enkontru entre lideransa nasional dadaun ne'e realiza hela iha Palásiu Prezidensiál hodi tetu hamutuk hanoin no konstitusionál relasiona ho impase polítika ne'ebé akontese.
Diálogu ne'e halo hodi responde ba ezijénsia nasaun nian hafoin enfrenta impase polítika durante tinan rua nia-laran.
Liuhusi komunikadu imprensa Prezidénsia Repúblika, ne'ebé
www.tempotimor.com asesu, lider istóriku ne'ebé hola parte iha reuniaun ho Prezidente Repúblika ne'e maka Mari Alkatiri, José Ramos Horta, Lere Anan Timur no Roque Rodrigues.
Husi lista konvidadu, uniku Eis-Prezidente Repúblika atuál Prezidente Partidu CNRT, Kay Rala Xanana Gusmão, mak auzente iha enkontru entre lider nasionál.
Maski nune'e, ho reuniaun ne'e hein katak sei hetan dalan ida ne’ebé atende diák liu ba kestaun polítika no tuir Konstituisaun RDTL haruka.
"Parlamentu Nasionál la aprova proposta lei Orsamentu Jerál Estadu (OJE), ita laiha osan atu hala’o dezenvolvimentu iha tinan 2020," hakerek karta komumikadu ne'e, Segunda (10/2).
Iha karta ne'e hakerek, bele uza de’it Orsamentu Duodésimu atu selu hanesan saláriu, pensaun, bolsa da mãe no seluk tan, enkuantu Parlamentu Nasional la aprova OJE.
Situasaun ne’e ezije vontade polítika, laran nakloke ba malu, liuliu husi lider polítiku sira husi partidu ualu (8) ne’ebé tuur iha Parlamentu Nasionál.
Antes ne'e, Prezidente Repúblika halo ona diálogu ho partidu poliítiku sira, organizasaun sosiedade sivíl, Igreja Katólika no konfisaun relijioza sira seluk, jurista no personalidade oioin atu buka solusaun ba situasaun polítika konstitusionál foun ne’e, hafoin Parlamentu Nasionál rejeita proposta Orsamentu 2020.
Tuir Konstituisaun Repúblika, liuhusi númeru 1, artigu 74, fó kbiit ba Prezidente Repúblika atu kaer metin unidade Estadu nian no funsionamentu normál instituisaun demokrátika Estadu nian, hanesan Parlamentu Nasionál no Governu.
Haree ba kbiit ne’e mak Prezidente Repúblika hahú diálogu ho parte hotu-hotu atu utrapasa situasaun impase polítika ne'ebé akontese. (*)