Momentu Prezidente Repúblika, Francisco Guterres Lú Olo, halibur hamutuk lider nasional sira hanesan lider istóriku no personalidade sira ne’ebé hanesan Eis-Prezidente Repúblika, Eis-Primeiru-Ministru, Kay Rala Xanana Gusmão, Eis-Prezidente l, José Ramos Horta, Eis-Prezidente no atuál Primeiru Ministru, Taur Matan Ruak, Eis-Primeiru Ministru, Mari Alkatiri, Xefe Estadu Maiór Jenerál F-FDTL, Majór Jenerál Lere Anan Timur no veteranu Roque Rodrigues.

Enkontru ne'ebé dadaun ne'e realiza iha Palásiu Prezidensiál, iha Bairru-Pité, Segunda (10/2), úniku lider Maun Boot Xanana Gusmão mak la marka prezensa, seidauk hatene klaru razaun Xanana la partisipa maibe tuir informasaun Eis Prezidente no eis-Primeiru Ministru atuál Prezidente CNRT ne'e dadaun ne'e iha Lospalos-Lautem.

Nune'e, prezensa lider hanesan Xefe Estadu Maior Jeneral Falintil-FDTL, Major Jeneral Lere Anan Timur mak too uluk iha Palásiu Prezidensial Nicolau Lobato, tuku 08:58, eis-gerrileiru ne'e hatais farda militar nian, ho oin mamar prense lista prezensa.

Hafoin Lere, iha tuku 09:14, tuir kedas lider istóriku seluk hanesan premiadu Nobel da Paz, José Ramos Horta, eis-prezidente ne'e uza xapeu mean, jaket kulit koor matak no tais tara ba kakorok hodi asina lista prezensa ho hamnasa midar.

Atual Primeiru Ministru Taur Matan Ruak to'o iha Palásiu Prezidensiál Nicolau Lobato uza Kareta Primeiru Ministru, iha tuku 09:14.

TMR uza kamiza tais kor matak ne'ebé akompaña husi eskustu, hanesan babain eis-Jeneral Fitun rua ne'e sempre hamnasa no taka liman sinal hasee.

Ikus liu husi prezensa lideransa iha Palásiu Prezidensial Nicolau Lobato mak atual Sekretáriu Jerál FRETILIN Mari Alkatiri too iha oras 09:25 uza kazaku koor biru tua (atu metan oituan).

Hafoin lider nain haat ne'e hein iha sala CPLP durante 20 minutu. Lider sira ne'e sae kedas ba fatin enkontru Nino Conis Santana iha tuku 09:41 ne'ebé iha ne'ebá hein ona lider veteranu Roque Rodrigues no Prezidente Repúblika,  Francisco Guterres Lú Olo.

Dadaun ne'e enkontru realiza hela no seidauk hatene loloos enkontru entre lideransa sira ne'e remata sá oras.

Antes ne'e, Prezidente Repúblika hato'o ona karta konvite ba lider istóriku sira atu halao enkontru relasiona ho impase polítika ne'ebé akontese. (*)