Prezidente Konsellu Kombatente Libertasaun Nasional, Vidal de Jesus 'Riak Leman' husu ba maun boot sira hanesan Xanana, Alkatiri, Taur Matan Ruak, Prezidente Repúblika no Lere atu tuur hamutuk hodi rezolve impase polítika ne'ebé hotu-hotu enfrenta.
Tuir Riak Leman Tempu funu lider sira hamutuk ho povu tomak, veteranu inklui joven sira hodi hakotu funu ne'ebé naruk tebes, rezulta ema barak mak mate ba rai ne'e.
"Ha'u hanoin impase polítika oan ne'ebé mosu ne'e buat ki'ikoan," dehan Riak Leman, iha Palásiu Prezidensiál, Segunda (3/2).
Veteranu sira hato'o hanoin lider sira tuur hamutuk ba Prezidente Repúblika, Francisco Guterres Lú Olo bainhira presta konvite hodi halo diálogu ho Prezidente Repúblika.
Entertantu konsultasaun Prezidente Repúblika ho entidade sira tama ona ba semana tolu ne'ebé tuir ajenda Segunda (3/2) rona hanoin husi Konsellu Kombatente Libertasaun Nasionál remata kontinua kedas no Câmara Comersiu no Indústria (CCI-TL). (*)