Tempotimor (Dili) - Porta-vós blolu koligasaun Aliansa Mudansa ba Progresu (AMP), Taur Matan Ruak, reziste nafatin katak AMP la eziste ona. Nune'e, rejeita konferénsia hodi hakotu vida AMP.

Prezidente Partidu Libertasaun Populár (PLP) ne'e hateten, husik CNRT mak halo mesak konferénsia no Taur Matan Ruak lakohi ona.

"Sira ba-ba, ha'u lakohi ona," dehan Taur Matan Ruak, iha Palásiu Prezidensiál,Bairru-Pité, Kinta (30/1).

Taur esplika, nia rasik mak hakoi ona AMP bainhira CNRT baku mate iha Parlamentu Nasional, iha Sesta (17/1).

"AMP! CNRT oho tiha ona iha dia 17 (Janeiru 2020), ha'u hakoi tiha iha dia 20 (Janeiru 2020)," tenik nia.

Taur hatete, dadaun ne'e Prezidente Repúblika, Francisco Guterres Lú Olo, halo ona kontaktu ho entidade hotu tanba Primeiru Ministru rasik mak entrega atu deside. 

Antes ne'e, Partidu Consello Nacional Reconstrução Timor-Leste (CNRT) sei konsidera nafatin ezistensia bloku Aliansa Mudansa ba Progresu (AMP).

Sekretáriu Jerál Partidu CNRT, Francisco Kalbuadi Lay hatete, mezmu Primeiru Ministru, Taur Matan Ruak, deklara AMP laiha ona maibé juridikamente sei eziste tanba bloku koligasaun nee forma liuhusi konferénsia.

"Tuir juridiku eleitorál AMP harii husi konferénsia no laiha mós tenke husi konferénsia", dehan Sekretáriu Jerál CNRT, Francisco Kalbuadi Lay.

Nia esplika, formasaun AMP liuhusi konferénsia rua, ida konferénsia interna partidu nian hafoin lori fali ba konferénsia nivel bloku koligasaun.

Bloku AMP rasik rahun hafoin Partidu CNRT vota abstensaun ba OJE 2020 iha Parlamentu Nasionál, iha Sesta (17/1). (*)