AMP La Tauk Sakrifika Vida Povu

Bandeira tolu ne'ebe uluk monta iha buletin de votus iha 2018 Bandeira tolu ne'ebe uluk monta iha buletin de votus iha 2018 Foto suplai
Tempotimor (Dili) - Orsamentu Jerál Estadu (OJE) tinan fiskál 2020 ne'ebé xumba iha Parlamentu Nasionál lori fenómenu foun ba nasaun ne'e. Dezenvolvimentu la la'o no povu sai vítima nafatin.

Ne'e duni, iha prosesu ukun VIII Governu nian la'ós vida governu de'it maka sira sakrifika, maibé povu mós sai vítima ba bloku koligasaun Aliansa Mudansa ba Progresu (AMP) nia hahalok.

"La'ós de'it kargu Xefe Governu maka hetan amesa, maibé povu mós sira sakrifika", dehan Diretór Ezekutivu Asosiaun HAK, Manuel Monteiro, iha knaar fatin, Faról, Kuarta (22/1).

Tanba ne'e, nia dehan, koligasaun Aliansa Mudansa ba Progresu (AMP) la dura tanba priénxe kadeira hodi buka hariku-aan.

"Tanba (AMP) ba halo koligasaun ho intensaun atu hariku-aan la'ós atu hadi'a povu-nia moris," tenik nia.

Nia esplika, koligasaun AMP forma atu priénxe kadeira hodi hadau-malu podér ba ukun nian, maibé la'ós ho objetivu ba prosperiedade povu nian.

"Koligasaun AMP hatudu momoos katak hadau poder hanesan labarik sira hadau dosi ikus mai putus," dehan Monteiro.

Laiha Konsertasaun polítika ka ideolojia partidu, uniku iha mak hadau poder.

Entertantu, tuir deklarasaun Primeiru Ministru, Taur Matan Ruak, nu'udar mós porta-vós bloku AMP, abertamente deklara, koligasaun nakfera tanba membru Partidu CNRT na'in hitu (7) ne'ebé la simu pose no mós sistema ne'ebé Primeiru Ministru rasik sobu.

Ikus mai, iha aprezentasaun Orsamentu Jerál Estadu (OJE) tinan fiskál 2020, iha diskusaun jeneralidade Bankada CNRT vota abstensaun no kontra.

Nune'e, OJE 2020 xumba iha PN, iha Sesta (17/1), ho rezultadu votu afavor 13, abstensaun 25 no kontra 15. (*)
 
Rate this item
(1 Vote)
Last modified on Wednesday, 22 January 2020 15:57
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com