Ministru Obras Publika Salvador Pires informa, MOP sosa ona makina teste alkatraun no daudaun ne’e makina refere to’o ona iha Timor Leste.
"Makina ida ne'e ajuda tebes ita-nia prosesu verifikasaun no inspesaun ba investimentu ne'ebe governu halo iha seitor estrada nian i hametin nafatin ita-nia misaun," dehan Salvador iha edifisiu Diresaun Nasional Peskiza MOP, Kaikoli, Dili, Tersa (14/1).
Ministru ne’e dehan, makina teste alkatraun ne’e nu’udar ekipamentu dahuluk ne’ebé Timor Leste iha no iha mós planu atu aumenta tan ekipamentu sira seluk.
"Governu agora sei tau inportansia maka’as ba investimentu laboratoriu nasional hodi asegura investimentu iha kapital, liu-liu iha seitor estrada.”
Ho makina ne’e, Ministru Salvador garante katak bao in sei bele asegura kualidade estrada sai di’ak liu no lalais liu tan.
Entretantu, bainhira jornalista sira husu kona-ba ninia aujensia iha audensia ba proposta Orsamentu Jeral Estadu (OJE) 2020 ho komisaun PN, Ministru ne’e rekuza atu hataan.
"Ida ne'e ha’u labele hatan," dehan Salvador ne’ebé hetan mós kritika tanba la marka prezensa iha audensia ho deputadu sira iha PN iha semana kotuk.