Tempotimor (Dili) – Institutu Petróleu no Jeolojia (IPJ) observa, investimentu planta LGN ne’ebé tuir governu nia planu sei harii iha kosta-sul, sei la hetan impaktu husi rai nakdoko no tsunami.
Prezidente IPJ, Hélio Casimiro Guterres hateten, razaun dehan laiha risku ba rai nakdoko no tsunami, tanba IPJ iha ona ekipamentu subistikadu, ne’ebé bele detekta.
Durante ne'e, tuir Guterres, IJP iha kolaborasaun di’ak ho Geo-Science husi Austrália no BMKG husi Indonézia.
“Ita temi risku, temi liu ba risku naturais no risku jeolójiku ou risku ne’ebé mai husi natureza. Ekipamentu ne’ebé maka atu detekta IPJ iha ona, kolabora mós ho Geo-science Austrália no mós BMKG (Indonézia). Husi ekipamentus ne’ebé ita planta no mós husi dadus ne’ebé rejístu husi tinan 1970 to’o agora, menus no laiha risku ne’ebé maka bo’ot atu akontese iha ne’ebá,” esplika Guterres, Segunda (16/12/19) iha ninia knaar fatin, área Delta, Dili.