"Proposta balun, meza la admite maka proposta sira ne'ebé hasai osan RAEOA nian, eh ida seluk mak husu atu hasai osan husi fundu COVID-19," dehan Aniceto hafoin halo anúsiu ba submisaun no admisaun proposta alterasaun liuhusi deskusaun ho aprovasaun espesialidade ba proposta OJE 2023, iha plenaria PN, kinta (10/11).
Nia dehan, fundu covid-19 ne'e, presiza konsiensia husi deputadu hothotu nian, tanba PN iha reuniaun plenaria parte dader nian, deside aprova tiha ona lei ida kona-ba medida esensionais ba COVID-19 ninian, tanba Covid-19 hahú alastra ona iha nasaun sira seluk.
"Ita la hatene bainhira mak to'o iha ita, eh keta tama tiha ona karik, derepente alastra tán pandemia, entaun ita hamamuk tiha fundu ne'e, tanba proposta sira tama mai ne'e soma ba nia valor hamutuk US$48 milloens, enkuantu fundu COVID-19 iha de'it US$18 milloens, entaun proposta la admite," nia dehan.
Maibé, depende desizaun, tanba meza sei submete ba plenáriu, halo rekursu ba proposta sira-ne'ebé atu hasai osan husi fundu COVID-19.
"Mais pandemia kuandu tama la haree deputadu ka la'os deputadu no la haree membru governu, nia sapurata," nia afirma.
Proposta ne'ebe submete husi deputadu sira ba meza, seidauk konfirma númeru loloos, maibé felismente besik 100 no balun la admitidu.
Proposta hirak ne'ebe meza la admiti ne’e, tanba balun husu atu aumenta orsamentu iha OJE 2023 no balun husu hasai osan ba sosa kareta pajero sport 35 ne'ebe PN prevee, iha mos kona-ba atu hasai osan husi rezerva kontejénsia, maibé rezerva kontijensia agora ejatu númeru la fiksu, kuaze hela de'it ona millaun US$66.
Tuir lei orsamentu LEO katak, osan rezerva kontijensia tenke pursentu 5, maibé agora osan montante ne'ebe sita iha proposta ne'e kuaze hela de'it 2 pursentu.
Nune'e, meza PN iha obrigasaun legál, atu la autoriza hasai tan osan, tanba Lei das Grandes Opsoens ne'ebe aprova ona iha fulan hirak liubá, define tiha ona tetu orsamentu ida-ne'e.
"Ejatamente tetu ida-ne'e mak governu submete mai, iha proposta ida agora husi governu, hanesan obrigasaun legál ida, meza la admite, eh ha'u mos aviza tiha ona katak, se iha proposta atu ultrapasa tetu, sei la admite," nia afirma nia.
Deputada Bankada Partidu Demokratiku (PD), Elvina de Souza, rekore ba plenaria atu halo rekursu hodi responde ba desizaun meza nian tuir rejimentu artigu 66.
"Tanba la admite proposta númeru 74, 55, 37, 41, 60 no 63, ha'u rekore ba plenária hodi halo rekursu, hodi hetan konsiderasaun husi distintu deputadu sira, tanba proposta alterasaun sira-ne'e ha'u konsidera importante tebes," nia konsidera
Pozisaun PD halo Proposta númeru 41 hodi foti osan husi fundu covid-19 atu prevee ba Ministeiru Negoósiu Estranjeiru no Kooperasaun (MNEK), bazeia ba audensia hotu ne'ebe hala'o husi Komisaun B ne'ebe deteta katak, proposta sira ne'e iha atu apoiu MNEK. (*)
