“Resposta ida hanesan ofisiál ne'e laiha. Reasaun konkreta seidauk iha mais hatene katak espresaun jestu ita haree di'ak, haree husi sira jestu ne'e iha reasaun”, dehan PPN Aniceto hafoin audénsia ho Prezidente Repúblika (PR), José Ramos Horta iha Palásiu Prezidensiál Bairo Pite, sesta (02/09).

Tanba vizita ne'ebé delegasaun Prezidente Parlamentu Nasionál hala'o ba Ketua Dewan Perwakilan Rakyat, Republik Indonesia (DPR/RI), Puam Maharani, ko'alia mós kona-ba dokumentu ida-ne'e maibé resposta ofisiál husi parte DPR-Ri mak seidauk iha.

Maibé Parlamentu Nasionál rasik hanoin laiha rai ida ne'ebe la interese ho isu ida-ne'e maske Timor-Leste mak adopta hanesan dokumentu nasionál ida no dokumentu referénsia ho Estadu tomak.

Tanba pais sira seluk kazas tan iha Indonézia mós sira-nia líder sira husi izlamiku ho kristaun mós komesa ko'alia ona, maibé atu adopta ka la adopta ne'e desizaun polítika ida.

Hanesan ezemplu ida mak Timor-Leste adopta dokumentu Fraternidade Umana ne'e tanba desizaun ne'e desizaun polítika.

Tanba ne'e, Parlamentu Nasionál sei labele interfere Indonézia nia desizaun polítika maibé prinsipalmente Parlamentu hato'o ona katak iha  nesesidade bele adopta dokumentu sira-ne'e sai hanesan dokumentu referénsia no hariku liután prinsípiu báziku sai baze ba relasaun rai rua nian. (*)