"Lahatene se desizaun ne'e Sekretariu jeral nian ka Meza parlamentu nian, ba projetu ida ne'ebe laiha liu kualidade hodi pinta iha resintu parlamentu ninian, liliu iha sala Bankada CNRT nia oin, ho kor Bandeira RDTL ka kor bandeira FRETILIN ninian, ha'u lahatene. Maibe kor ida ne'eba ne'e kor bandeira, pinta ho tinta ne'ebe laiha kualidade, semana-tolu ona tinta sira-ne'e agora nakloke hotu ona, halo konke kareta parlamentu nian ka deputadu sira nia labele estasiona ho di'ak iha fatin resintu ne'ebe destakadu ba parkiran,'' hatete nia iha plenaria PN, segunda (03/10).

Preokupasaun ida-ne'e semana kotuk levanta tiha ona no husu atu esplika, tanba saida mak pinta fali ho tinta ne'ebe laiha kualidade, maibé to'o agora nein iha resposta ida husi sekretariadu jeral parlamentu inklui meza parlamentu nasional nian rasik.

"Ita-boot sira orsida plenaria hotu bele tun tok ba haree tinta sira ne'e nakloke hotu kualidade laiha, ita lahatene objetivu ne'e saida hodi pinta fali koor bandeira nian ba," hatete nia.

Bankada CNRT haree situasaun ne'e sente triste tebtebes, tanba se hakarak pinta, entaun pinta ho tinta ne'ebe kualidade, maibe objetivu lolos ba tinta fali ho kor bandeira ne'e mak CNRT mos la kompriende tanba sá, no pior laiha kualidade.

Haree ba atetude Parlamentu Nasional nian, tanba keta hakarak gasta de'it osan ou osan barak liu mak lahatene atu gasta, ida-ne'e parte meza tenke esplika, atu deputadu sira labele uza fatin ida ne'eba.

"Tanba agora ne'e, tinta nakloke kareta sira ba para roda sira ne'e sai kor bandeira ninian, ita hodi sama halimar fali iha rai," dehan nia

Prezidente Parlamentu Nasional, Aniceto Longuinhos Guterres Lopes hatete, kona-ba kestaun tinta, ida-ne'e la'os kompeténsia meza Parlamentu nian, tanba ne'e sei konfirma asuntu refere ba sekretariu jeral PN.

"Meza Parlamentu la urus tinta ida, orsida ha'u sei konfirma iha sekretariu jeral," nia informa. (*)