"Ita hein katak, udan ida mai hela dadaun ne'e pratikamente projisaun metrolojia nafatin dehan, foho sira ne'e sei udan. Ne'ebé husu para karik Ministeriu Obras Públika haree oinsa mak halo prevensaun mota Maloa ne'e, tanba mota maloa ne'e risku tebes, la'os de'it ba komunidade maloa oan, maibé mos tun mai palásiu Prezidensial, mai mos Bebora, ne'ebé mak depois de dezagoa tan tama to'o farol sira-ne'e," dehan Deputadu Kalohan iha plenaria, tersa (04/10).

Tanba, iha mota Maloa rasik, udan ne'ebé akontese foin dadauk, konsege sobu tan estrada Maloa nian maske iha ona barajen ne'ebé halo, tanba dala-ruma Governu seidauk iha osan, entaun halo hela de'it metru 50 husik hela nia roha, ho nune'e horbainhira kontinua monu no agora kuak fali tan ba estrada laran.

"Ne'ebé ida-ne'e hanesan ha'u husu MOP atu tau prioridade ida ba," dehan nia

Alende ne’e, husu ba Ministériu Saúde (MS) atu halo sensibilizasaun no prevensaun moras dengue iha tempu udan.

Tanba, realidade foin dadauk udan monu rai, iha area seluk mak deputadu ne'e ladun hatene, maibé parte ba fali sira nia hela fatin susuk komesa barak, tanba ne'e hanoin tenke iha asaun prevensaun ida husi MS.

"Kampaña sensibilizasaun ne'e importante nafatin, maske saúde iha ita-nia liman rasik mais ha'u husu saúde para halo prevensaun ida hodi evita moras ba labarik sira, tanba udan ida primeiru ne'e normalmente lori ninia kauza ne'e oioin liliu labarik sira moras, susuk buat sira ne'e hotu, ne'ebé ha'u Saúde mós bele halo asaun ida ba ida-ne'e," nia dehan

Prezidente Parlamentu Nasionál, Aniceto Longuinhos Guterres Lopes, hatete kona-bá preokupasaun sira-ne'ebe deputadu sira levanta ne'e rejista ona no sei enkamiña ba Ministeriu Asuntu Parlamentár no Komunikasaun Sosiál (MAPKomS) atu bele atualiza ba kada Ministeriu relavante hodi haree preokupasaun hirak ne'e. (*)