“Iha eleisaun Prezidensiál foin dadaun ne'e ita estabelese de'it sentru votasaun 1200, no estasaun votu 1500. E planu ne'e ha'u ko'alia ho STAE para verse aumenta sentru votasaun husi 1200 ba 1500, no estasaun votu ne'e aumenta husi 1500 ba 1900”, dehan nia hafoin audénsia ho Prezidente Repúblika, José Ramos Horta, iha Palásiu Prezidensiál Bairo Pite, sesta (26/08).
Tanba atu hasa'e taxa partisipasaun iha eleisaun Parlamentár mak Governu hanoin katak presiza aumenta tan pursentu 30 ba sentru votasaun no estasaun votu sira, atu nune'e sentru votasaun bele besik liubá eleitór sira hodi permite vota barak liu.
“Ha'u fiar ho aumenta númeru ida-ne'e sei iha impaktu orsamentál mais nia vantajen mak ne'e urna sira-ne'e besik liubá ita-nia votante sira e ida-ne'e bele kontribui ba aumentu de taxa partisipasaun”, dehan nia.
Tanba taxa partisipasaun eleisaun Prezidensiál foin dadauk ne'e primeira volta de'it 77% ke barak liu kompara ho eleisaun 2017, maibé felismente iha segunda volta nian, tun fali ba pursentu 75.
Nune'e, Governu planu hakarak kria tan sentru votasaun atu garante de'it ema barak liután bele partisipa iha eleisaun Parlamentár 2023.
Tanba ne'e, Governu mós preparadu hela atu realiza eleisaun Parlamentár ne'ebé previstu iha 2023.
Ba eleisaun Parlamentár rasik oras ne'e dadaun, Governu liuhusi orgaun eleitorál STAE halo preparativu sira atu organiza eleisaun Parlamentár maibé nia data ba eleisaun konforme konstituisaun no lei eleitorál katak Prezidente Repúblika mak sei deside hafoin konsulta ho Governu nomós ho Partidu Polítiku iha Parlamentu Nasionál.
Dadauk parte STAE mós halo hela preparativu sira no tempu ida agora sei halo autorizasaun baze de dadus no resenseamentu faze primeiru nian ke sei termina iha fulan-novembru tinan 2022.
Iha fali fulan-dezembru 2022 STAE sei kontinua halo atualizasaun sira seluk no iha fulan-janeiru to'o maiu, sei kontinua ho atualizasaun baze dadus no resenseamentu eleitoral foun ne'ebe la'ós de'it iha rai laran maibé mós iha rai liur.
“Entaun STAE halo preparativu sira atualizasaun baze Dadus no resenseamentu eleitorál nomós sosa ekipamentu adisional sira ke ami hanoin presiza tan para ke atu realiza eleisaun Parlamentár”, afirma nia. (*)
