MF: Alokasaun OJE Depende ba Atividade Governu

Ministra Financas, Sara Lobo Brites Ministra Financas, Sara Lobo Brites Foto Especial

Tempotimor (Dili)-Mosu kritika no ameasa husi Bankada apoiu governu relasiona ho montante Orsamentu Jeral Estadu (OJE) 2020 ne'ebé konsidera boot tebes, atinze billaun $1.95. Ba kestaun ne'e Ministra Finansas Interina Sara Lobo Brites dehan, montante orsamentu iha kada tinan depende ba atividade governu.

Tuir Ministra Sara katak, OJE 2020 ho montante boot, billaun $1.95 maibé la signifiaka ba tinan sira tuir mai mós tenke aprova ho montante boot liu tan, maibé depende ba atividade governu nian.

Nia dehan, orsamentu ho montante boot ne'e mai husi atividade lubuk ida ne'ebé governu presiza atu implementa iha tinan oin.

"Orsamentu ne'ebé agora ho montante boot tanba iha programa lubuk ne'ebé presiza implementa iha tinan oin, maibé, la signifika iha tinan tuir mai mós ita kontinua aprova ho montante boot," esplika Ministra Sara iha palasiu governu, Tersa (05/11/19).

Nia afirma, OJE 2020 ne'ebé boot ne'e atu implementa atividade no aselera mós prosesu balun ne'ebé mak estrateziku no presiza atu implementa lalais.

"Orsamentu tau boot la'os naran tau arbiru dei't, maibé, iha mós ninia target par bele rezolve nesesidade povu nian," nia afirma.

Molok ne'e, Deputada CNRT iha Parlamentu Nasional (PN), Virginia Ana Belo ameasa vota kontra Orsamentu Jerál Estadu (OJE) 2020, bainhira livru Panorama Orsamentál 2020 la tuir estrutura no aumentu laiha balansu.

"Ita boot sira iha esperiénsia naruk. Liuliu maluk tékniku sira. Maibé, ha'u fó de'it ezemplu ida iha transferénsia públika. Orsamentu atu halo eskola no orsamentu atu konstrui klínika. Halo nusa mak ba tau fali iha transferénsia públika?" husu Prezidente Komisaun D, Virginia Ana Belo iha plenária PN, Segunda (04/11/19).

"Sosa ró-ahi versu II tau fali iha bens no servisu. Saida mak ne'e señora ministra? Ha'u bilán tiha de'it kuandu haree livru orsamentu ida ne'e. Buat hotu ida loloos, iha kapitál menor no kapitál dezenvolvimentu mós mai fali iha transferénsia públiku. Tanba ne'e, osan sira ne'e presiza muda ba nia fatin. Se la muda, ha'u nia pozisaun mak vota kontra," dehan Virginia.

Nia afirma, deputadu hotu-hotu iha ninia pozisaun. Tan ne'e, nia hakarak hateten katak ne'e fora husi orientasoens. Ida ne'e, ninia deklarasaun privadu.

“Sei kolokasaun orsamentu ida sabraut ida hanesan ne'e, ha'u nia pozisaun mak hanesan ohin ha'u dehan, sei vota kontra orsamentu liuliu iha ministériu finansas," nia dehan.

Nia hatete, nu'udar deputada nia apoiu ba Governu. Tan ne'e, sei nia mesak mak vota kontra laiha impaktu. Tanba, tuir Prezidente Komisaun D ne'e, iha deputadu no deputada barak mak sei apoiu ba Governu.

"Ha'u mesak mak vota kontra laiha impaktu. Kolega deputadu barak mak apoiu ba Governu. Ne'ebé laiha impaktu," nia dehan.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.