Politika promosaun husi SEFOPE ne'e implementa husi adidu Timor Leste nian iha Australia.
"Iha loron 30 fulan Outubru to'o loron 4 fulan Novemberu 2019, SEFOPE liu husi adidu Timor Leste ba Australia, kontinua halo promosaun ba traballadór Timor Leste ba toos-nain sira iha Australia, liu-liu iha área remotas hanesan Pemberton," informa adidu Timor Leste ba Australia, Antonio Armindo, Segunda (04/11/19).
Adidu ne'e dehan, nia parte halo promosaun liu husi sorumutu ho toos-nain sira.
"Iha momentu ne'e adidu trabalu hasoru diretamente ho toos-nain avokate, derok no fehuk midar. Iha tinan ida ne'e no tinan oin mai toos-nain sira sei persiza tan traballadór Timor-oan," dehan António.
Iha sorumutu ne'e, Antonio dehan, nia husu ba toos-nain sira atu rekruta de'it traballadór husi Timor Leste.
"Husu ba toos-nain sira hodi halo rekrutamentu de'it ba traballadór Timor-oan, tanba jeografikamente Australia besik ba Timor no traballadór Timor-oan mós serbisu di'ak tebes no mós iha étika no sira serbisu nunka halo problema ne'ebé mak seriu, kompara ho nasaun sira seluk," nia dehan.
Iha oportunidade ne'e, Antonio dehan, toos-nain sira lori adidu TL ba vizita sira-nia toos, inklui fatin ne'ebé traballadór sira atu hela.
"Toos-nain sira seidauk hatene Timor (Leste) no nunka uza traballadór husi Timor, maibé toos-nain sira sei haruka pedidu rekrutamentu liu husi ajensia sira ne'ebé toos-nain hakarak atu rekruta," nia dehan.