“Tanba ita halo Komisaun Verdade e Amizade (CVA) ho Indonézia maibé lideransa Timor-Leste laiha vontade polítika karik, laiha korajen para hatete, taka duni problema 1999”, dehan nia iha Edifísiu Komandu Jerál PNTL, Kaikoli, sesta (12/08).

Tanba Timor-Leste nu'udar Estadu halo CVA ho Indonézia, no iha nível Xefe Estadu iha Timor la halo lejislasaun nasionál atu taka problema refere, ida-ne'e nu'udar Xefe Estadu sente preokupa.

Ba prosesu ne'e, nasaun unida mak halo iha tinan 2000, no iha momentu ne'ebá Timor-Leste laiha desizaun soberanu hakarak loke prosesu ne'e ka la'e tanba Timor-Leste rasik seidauk soberanu.

Maibé felismente Nasaun Unida loke tiha ona prosesu ida-ne'e hodi halo indisiamentu ba Jenerál balun iha Indonézia nomós ba Timoroan lubuk ida.

Nu'udar Prezidente Repúblika hakarak ko'alia ho Partidu sira hotuhotu iha Parlamentu, oinsá kria meiu legál ruma, atu taka problema 1999.

Bainhira problema ne'e taka ona, la siknifika katak obriga ema sira iha Nusa Tengara Timor (NTT), atu fila mai Timor-Leste, maibé depende filafali ba sira idai-dak atu foti desizaun.

Tanba Timoroan lubuk ida iha Austrália mós balun to'o bei-oan no balun mate iha Austrália, maibé sira hakarak mai vizita Timor-Leste.

“Iha NTT mós hanesan, se para sira mai, sira la tauk, stres, dehan ba karik depois Polísia kaer ha'u iha Suai ho Mota-Ain ne'ebá”, afirma nia. (*)