“Simbolikamente para tinan-lima mai ne'e, ami ne'ebé jerasaun 1975 mais la'ós de'it jerasaun 1975, ho líder sira seluk tenke halo diálogu para haree konsensu nasionál ruma, para haree rezolve dezafiu boot rai ida-ne'e nian. Liliu iha ita-nia sistema polítiku partidáriu, demokrásia, estadu de diretu e ekonómia”, hatete nia iha edifísiu Komandu Jerál Polísia Nasionál Timor-Leste (PNTL) Kaikoli, sesta (12/08).

Kona-ba prespetiva Xefe Estadu nian ba diálogu ne'e públiku tomak hatene, Prezidente Repúblika sempre hasoru Líder Nasionál sira hanesan Mari Alkatiri, Primeiru Ministru, Taur Matan Ruak, inklui mós Kay Rala Xanana Gusmão.

Dadauk Sekretáriu Jerál FRETILIN, Mari Alkatiri rasik ko'alia ona iha tempu sertu, bainhira Kongressu Nasionál FRETILIN nian iha fulan-setembru 2022 no Independentemente rezultadu kongresu ne'e, liu tiha, mak sei haree possibilidade bele buka halo diálogu ba oin, hodi haree dezafiu ne'ebé Timor enfrente 2023 ba 2028.

Tanba ne'e hanesan diálogu normál ida, no Xefe Estadu sei laiha preokupasaun liu kona-ba líder nasionál sira tenke ko'alia ba malu, tanba Timór ne'e la'ós Sudaun Súl ka Mianmar, ne'ebé iha konflitu.

Timor-Leste hanesan nasaun independente ida labele de'it demokrásia di'ak, maibé ekonómia la di'ak, ne'e duni tenke haree tinan sira mai oin, kuandu tama ASEAN presiza servisu maka’as liután tanba ASEAN fó oportunidade ba Timor-Leste nia ekonómia atu haksoit ba oin.

Nune'e mós Prezidente Repúblika mós sempre mantein kontaktu maka’as ho autoridade sira iha Indonézia inkluindu Governur NTT nomós iha breefing ona ba Primeiru Ministru no Kay Rala Xanana Gusmão ho líder sira hothotu kona-ba Indonézia hakarak implementa ideia iha área fronteira entre Timor-Leste ho Indonézia.

“Prezidente Repúblika Indonézia ho Governur NTT hakarak halo ho Timor-Leste, zona industriál iha Fronteira Suai-Maliana, Zona Komérsiu Livre iha Oekussi ho NTT, ne'e tenke la'o ba oin”, dehan nia. (*)