“Durante tinan 20 ona Timor-Leste ukun-an ami foin hetan milagre, tanba prezidente bele hola ami-nia ai-fuan iha Palásiu Prezidensiál Ai-tarak Laran, ami sente foin hetan prevelijiu mak prezidente sosa ai-fuan ne'e”, dehan Portavoz Lito da Costa Andrande, konferénsia imprensa iha Jardin 5 Maiu, Kolmera, sesta (01/07).
Maske husi deputadu Fretilin sira iha Parlamentu Nasionál halo ai-leba tama iha Palásiu Prezidensiál hodi fa’an ai-fuan hatun dignidade nasaun nia, maibé Ai-leba rasik la konsidera palásiu hanesan merkadu ba fa’an ai-fuan
“Ami orgullu programa prezidente ida bolu ami, bele tama palásiu prezidensiál, sira konsidera palásiu la'ós merkadu, sira bolu ami ba atu hola ami-nia sasán hanesan ai-fuan, saburak, hudi, ai-dila no ainanas”, hatete nia.
Tanba foin primeira vez Prezidente Repúblika, José Ramos Horta autoriza vendedór ai-leba hakat tama ba Palásiu Prezidente ho produtu ai-fuan.
“Ami sente kontente bainhira tama iha Palásiu Prezidente Repúblika Ai-Tarak-Laran, ami konsidera hanesan nasaun ami hotu nian”, deklara nia.
Ho desizaun ne’ebé foti husi Xefe Estadu, konsege ajuda ai-leba sira, tanba bele lori ai-fuan ba Palásiu Prezidente Repúblika hahú segunda to'o sesta.
“Ami vendedór sempre iha solidariu ba malu, katak ami hakarak ami hotu hetan ba fa’an ai-fuan iha palásiu, ami lakohi grupu ida mak asesu iha Prezidente Repúblika, ne'e ami sente triste, tanba prezidente la'ós ami mesak de'it, ba ai-leba hotu”, esplika nia. (*)