“Ha'u hanoin aviaun balun besik mai ona, sidadaun balun kuandu iha aeroportu ami sei haruka fila, sira labele kontinua hala'o sira-nia viajen ba Portugal”, dehan Vise Ministru Negósiu Estranjeiru no Kooperasaun (MNEK), Julião da Silva iha Parlamentu Nasionál, kuarta (29/06).

Tanba atu ba servisu iha Portugal ka Estranjeiru ne'e presiza iha justifikasaun formál bainhira laiha justifikasaun ruma husi sidadaun sira mak Governu sei la tolera sira-nia viajen ba Estranjeiru.

“Sira labele kontinua hala'o sira-nia viajen ba Portugal, kuandu laiha justifikasaun klaru, laiha bilete ba no mai (tikete pergi dan pulan-PP) laiha ema se mak iha ne'ebá, ne'e ita sei kansela sira-nia viajen”, dehan nia.

Ba preokupasaun ne'e Governu mós informa ona ba Komisan B iha Parlamentu Nasionál kona-ba grupu balun ne'ebé organiza ona sidadaun sira ba rai-liur.

Ba sidadaun ne'ebé hakarak ba servisu iha rai-liur ne'e parte Ministériu Negósiu Estranjeiru fó afavor no apoiu ida-ne'e tanba sira sa'e mós iha Embaisadór Timor ninian hodi manifesta pais iha mundu maibé tenke liuhusi odamatan, la'ós ilegál hodi prejudika fali sidadaun sira seluk.

“Ita-boot sira haree ita-nia sidadaun ba servisu iha Inglaterra, Irlándia, sira ba ho passaporte ne'e, por legál sira ba uza passaporte hanesan ema sidadaun portugeza mais kuandu hetan asidente ou mate ruma ne'e Governu ninia papel responsabiliza”, afirma nia. (*)