Tuir informasaun ne’ebé www.tempotimor.com asesu iha pájina MAPKOMS, kuarta (29/06) katak, akordu ne’ebé halo iha Dili loron 28 fulan-Juñu, atu empresa Banir Lema Unipesoal, Lda, nu’udar empreza manán na’in ba projetu kontrusaun hala’o servisu.
Tanba konstrusaun ne'e importante atu asegura ekipamentu sira hodi labele estraga, iha tempu udan iha tinan hirak liuba.
“Konstrusaun ba estúdiu ne’e importante tebes ho tipu provizóriu hodi asegura ekipamentu hotu nune’e labele hetan estragu hanesan tinan kotuk iha kalamidade husi udan boot no bee nalihun, liliu afeta no prejudika funsionamentu”, dehan Ministru Francisco Jeronimo, iha edifisiu RTTL EP, Kaikoli, tersa (28/06).
Ba konstrusaun foun ne’e hala’o nafatin iha edifísiu RTTL EP tuan maibé muda ba kotuk atu halo estúdiu provizóriu foun ne'e.
Konstrusaun temporária ba edifísiu refere ho montante orsamenru $1.196.095,54 bazeia ba planu no polítika MAPKOMS nian ne’ebé prevé ona iha Orsamentu Jerál Estadu (OJE) 2022 iha fundu infraestrutura servisu no planu ba hari’i edifísiu permanente sei realiza iha tinan oin.
Diretór Kompaña Banin Lemar Unipessoal,Lda, Domingo mós kompromete katak nia sei garante hodi finaliza konstrusaun ba obra refere ne’e tuir períodu kontratu ne’ebé sei entrega iha fulan-dezembru tinan 2022.
Ba serimónia assinatura ne’e realiza iha instalasaun RTTL.EP nian iha Kaikoli, ne’ebé prezensa husi Prezidente RTTL.EP, José Antonio Belo ‘Taraleu’, Diretór Obras Públika, Xefe Gabinete MAPKOMS no SEKOMS, no Kargus xefia sira seluk. (*)
