Deputada Bankada CNRT, Virgina Ana Belo hatete, situasaun aktuál ne’ebé halo joven sira dezesperadu ikus mai monu ba manipulasaun husi individu ka ajensia balu atu ba servisu iha rai liur maske laiha akordu ruma entre Governu ho Governu.
“Hatudu mós faktu ida katak Governu laiha kapasidade hodi halo kontrolu ba situasaun sira ne’ebé akontese dadaun. Governu nia Kapasidade halo ezekusau, nune’e labele kria oportunidade ba joven sira, ikus mai Joven sira hili dalan halo esodus ka halai ba rai liur tanba lakon esperansa ba moris nian iha sira-nia rai rasik”, dehan Deputada Virginia, iha Parlamentu Nasionál, tersa (28/06).
Tanba polemika ba joven no sidadaun lubuk ne’ebé husik hela sira-nia hela fatin ho objetivu ba servisu iha rai liur, ne’ebé balun monu ba individu ka ajensia balu nia manipulasaun hanesan akontese ba joven feto na’in-7 ne’ebé oras ne’e enfrenta problema oioin hanesan mós iha Portugal.
“Polemiku joven lubuk ho nia objetivu ba servisu iha rai liur maske hasoru problema dezempregu hanesan problema komun ne’ebé nasaun sira foin ukun-an enfrenta iha istória mundu nian. Timor-Leste mós enfrenta situasaun ida-ne’e desde restaurasaun indenpendénsia 20 de maiu 2002, tanba situasaun ida-ne’e mak Governu anterior sira halo esforsu oioin hodi kria oportunidade ba joven timoroan sira atubele asesu ba empregu, no halo akordu entre Governu ho Governu atubele akomoda joven sira-nia nesesidade hodi hetan servisu”, afirma nia.
Ba akordu Governu ho Governu ne’ebé akontese ona mak entre governo Timor-Leste ho Repúblika Korea no Timor-Leste ho nasaun Austrália bainhira timoroan sira barak mak ba servisu iha Europea, liuhusi meius aplika dupla sidadania hodi sai Sidadaun Portuguéz.
Tanba akordu sira ne’e halo movimentus joven sira husi Timor-Leste ba rai-liur hetan kontrolu direita Governu Timor-Leste maibé semana hirak ikus ne’e mosu indikasaun foun Timor-Leste sai fali terminál sentru krime tráfiku umanu.
Ba fenomenu ida-ne’e Bankada CNRT preukupa situasaun sira, Tanba husi tinan 2018 to’o 2022 Parlamentu Nasionál aprova ona orsamentu jerál Estadu hamutuk billaun 9,5 maibé Gorvernu la konsege kria kampu traballu atu akomoda joven sira-nia nesesidade hodi hetan servisu.
Nune’e mosu problema iha prosesu rekrutamentu traballadór ba Austrália nakonu ho interese partidária, hanesan akontese tinan rua ikus ne’e, joven halo protesta oioin hasoru Governu tanba halo rekrutamentu bazeia ba kór partidu.
Aliende ne’e, jestaun rekrutamentu joven sira ba servisu iha Korea ladún la’o ho didi’ak hanesan akontese iha semana hirak liuba, bainhira joven sira sena malu dudu malu to’o sai lutu atubele ba rejista naran hodi tuir teste servisu iha Korea.
“Joven barak mak tuir teste ba servisu iha Korea no Austrália, maibé sira nia naran la sai maske lori ona tempu naruk pior liu mak kandidatu tuir teste ikus mai sira-nia naran mak sai uluk fali’, hatete nia.
Iha mós Partidu politiku balu aprova Joven sira-nia situasaun dezesperadu ne’e hodi halo propaganda katak partidu sira sei fasilita joven sira ba servisu iha rai liur, maibé ikus mai joven sira tenke terus iha ema nia rai. (*)
