Fasilitadór FHT, Hermundos Barreto, hatete, tuir planu workshop sei implementa iha Munísipiu 12 inklui Rejiaun Administrativu Espesial Ambeno Oe-Cusse (RAEOA), nune'e iha loron 16 fulan-maiu halo ona abertura iha Munísipiu Lautém no ohin loron 17 fulan-maiu tinan-2022, realiza tan iha Munísipiu Baukau no sei kontinua ba Munísipiu seluk.
Workshop internet saudável atu promove foinsa'e sira nia kapasidade ba utilizasaun internet tuir dalan loos, tanba utilizasaun média sosiál iha Timor-Leste ema barak mak konsumu informasaun falsu.
"Ami nia formasaun ne'e, hala'o durante loron 13 iha Munísipiu 12 Rejiaun Administrativu Espesial Ambeno Oe-Cusse (RAEOA), kona-ba atividade ne'ebé dadaun ami hala'o (workshop internet saudável) hetan hamutuk ho montante US$13 resin husi SEJD," dehan nia iha salaun enkontru edukasaun Baukau, tersa (17/05).
Tanba, tuir peskiza FHT, sidadaun iha TL kontribui informasaun falsu iha redi sosiál liu-liu iha parte facebook kuaze atinji pursentu 40, nune'e ho liuhusi workshop, garante sei minimiza informasaun falsu.
Durasaun tempu realiza workshop kada Munísipiu, loron ida tomak hodi fó hanoin ba partisipante sira atu hetan informasaun ne'ebé loos no kredível, tenke asesu husi média sira ne'ebé iha situs hetan legalizadu.
"Dezvantajem husi Hoax ne'e barak liu, informasaun lalos gosta trata insulta ema, ne'e signifika ita lajaga ema nia privasidade, sei kria dezintendimentu iha públiku," nia hatete
Nune'e, Ofisiál SEJD Munísipiu Baukau, Gabriel da Piedade Fraga, hatete, programa internet saudável ne'ebé realiza kada Munísipiu, atu hasa’e koñesementu foinsa'e sira nian ba utilizasaun internet tuir dalan loos.
"Duranre observasaun iha elesaun Prezidénsial nian, maioria utiliza internet nia impaktu ba komunidade, tanba ita kahur polítika insulta malu uza média sosiál parte ida ne'e mós afeita ba joven sira," nia argumenta
Enkuantu partisipante, Reinaldo de Almeida, informa, kuaze iha média sosiál liu-liu parte facebook, sidadaun sira balun lakon moral, tán fiar informasaun falsu.
"Ha'u husu parte Governu, bele karik haree asuntu ne'e, liuhusi workshop de'it sei laminimiza kontribui informasaun hoax, di'ak liu kria cibernetika ga babain iha nasaun seluk uza detekta ema lansa informasaun hoax," nia rekomenda
Entretantu partisipante iha workshop, estudante hamutuk na'in-66 kompostu husi eskola ensiñu báziku sentral (EBC-sigla portugés) Tirilolo, EBC vila nova, EBC kafé Baukau, eskola ensiñu secundária jerál (ESG-sigla portugés) Tirilolo, eskola sekundária Sacrojes Baukau inklui sentru formasaun sira. (*)
