“Prezidente Repúblika seidauk deside promulga ka veta diploma ne’e”, dehan nia hafoin serimónia kondekorasaun ba Kombatetnte Sobrevivente no Martires iha Palásiu Prezidensiál, segunda (16/05).

Diploma ne'ebé Prezidente Repúblika simu husi Parlamentu Nasionál kona-ba aprova pedidu husi Governu atu halo alterasaun ba Lei Orsamentu Jerál Estadu 2022, prevé billaun ida atu hari’i Fundu Veteranu, ida ne'e Prezidente seidauk deside promulgasaun.

Maibé, karik promulga, Governu mak sei haree, liuhusi Dekretu-Lei ida, sá modelu investimentu mak sei uza atu fó rendimentu boot no lalais liuba Fundu Veteranu.

“Tuir ezekutivu nia hanoin, ho osan-funan husi Fundu ne’e mak Governu sei uza ba programas apoiu ba Kombatente Libertasaun Nasionál iha área sosiál, edukasaun, saúde, empregu, asesu ba kréditu no mós atividade ne’ebé bele fó rendimentu”, dehan nia.

Ba fundu ida ne’e, tuir Governu nia hanoin, karik sei iha autonomia administrativa, finanseira no patrimoniál, sei la benefisia de’it sira ne’ebé klasifika nu’udar veteranu, ho partisipasaun luta tinan 15 to’o tinan 24 maibé hothotu ne’ebé validadu nu’udar Kombatente Libertasaun Nasionál.

Nune’e, osan billaun ida ne’ebé VIII Governu husu atu hasai husi Fundu Minarai, la´ós atu halo despeza, la’ós atu gasta, la´ós atu selu pensaun ka saída de’it, maibé atu lori investe iha fundu ida hodi hetan funan ba beibeik.

Iha ne'e, Prezudente Republika fiar katak, fundu ida ne’e ho jestaun di’ak no ho kontribuisaun hothotu nian, sei haburas no haklean sentidu solidariedade entre luta nain-sira no hamenus sira-nia dependénsia husi Fundu Minarai liuhusi Orsamentu Jerál Estadu.

Bazeia ba proposta Governu nian katak, fundu ne’e sei jere husi Konsellu Administrasaun prezide husi Primeiru-Ministru no sei envolve mós membru Governu ba asuntu kombatente libertasaun nasionál no finansas. (*)