“Dekretu Lei (5/2017) ne'e iha hela, agora halo tuir buat ne'e hanesan ne'e, ita kuandu tau Lei ida iha kedas ninia sansaun mós iha, kuandu sé mak viola sansaun mak ida-ne'e. Iha-ne'e horseik horbainrua ita autoriza reativa Arte Marsiál, la tama Arte Rituál”, dehan Xefe Bankada FRETILIN, David Dias Ximenes 'Mandati' iha Parlamentu Nasionál, kuarta (07/09).

Maibé ba asuntu ne'e depende ba Governu atu halo distinsaun (membedakan), nune'e bele aplika sasaun ka medida koasaun preventiva no represiva ba Membru Arte Rituál sira kuandu komentar infransaun.

Tanba presiza halo Lei hodi prevee medida koasaun dahuluk mak medida preventiva atu obriga sira atu kumpre maske kazu ne'ebé sira komete seidauk hetan finalidade no daruak mka medida represiva ne'e katak bainhira kazu ne'e to'o finál ona tenke halo represaun atu sira labele repete aktu ida-ne'e.

Nune'e mós Bankada FRETILIN hakarak ko'alia katak Governu labele taka no loke Grupu Arte Marsiál nomós Arte Rituál sira bainhira sira komete problema ruma.

“Loke ona purque ita kuandu taka fali ninia efeitu ne'e oinsá, agora ita loke fali ninia efeitu ne'e oinsá, agora ita buka maka rezolve fenomeno ida be tan saida mak ida-ne'e akontese, tenke hatene haree”, hatete nia.

Ba situasaun ida-ne'e Parlamentu Nasionál mós sei bolu' hikas Membru Governu nomós Komandu Jerál PNTL inklui KRAM atu deputadu sira bele husu kona-ba situasuan atuál ne'ebé mosu iha Komandu Munisípiu Dili.

Hatan ba kestaun ne'e, Prezidente Komisaun Reguladóra Arte Marsiál (KRAM) Timor-Leste, Octavio da Conceição hatete, sira-nia parte sei hala'o hela estudu ida kona-ba kria lei própriu atu regula atividade husi Grupu Arte Rituál (GAR) iha Timor-leste.

“Sei halo lei, lei própriu ida ba arte rituál. Sé hakarak hamosu Esbosu lei ba Arte Rituál presiza iha estudu ida, presiza iha peskiza ida hodi hatene loloos natureza husi arte rituál ne'e oinsá”, dehan nia iha edifísiu Ministeriu Interior (MI) kuarta (07/09).

Tanba husi lei númeru 5/2017 ne'ebé regula kona-ba arte marsiál, lei ne'e rask seidauk iha artigu ida espesífika liu atubele kontrola arte rituál sira-nia atividade.

Tanba ne'e Governu liuhusi Komisaun Reguladora Arte Marsiál (KRAM) iha hela prosesu estudu nia laran oinsá atu halo lei ida-ne'e.

Husi Esbosu lei refere, parte KRAM mós sei halo konsulta públika ida ho entidade hothotu bele fó hanoin hanesan mós ho kriasaun segunda diretiva ne'ebé ninia prosesu tomak mai husi konsulta públika ne'ebé KRAM hala'o iha nível Nasionál nomós nível munisipál sira iha teritóriu laran tomak. (*)