Xefe Bankada CNRT, Duarte Nunes hatete, osan ba hadi’a ema sira dezastre sira ne'e terus hela, seidauk halo buat di'ak tuir programa, maibé hamosu fali programa ida $200 ba kada famlía.

“Ha'u la temi ema nia naran tanba orsida ema hirus ha'u hatete nia mak riku liu be, mais ne'e hanoin tempu ida kampaña ne'e mak ko'alia ne'e politika, ne'e dalaruma ita buka atu lohi malu ko'alia lolos ne'e hanesan ne'e, ko'alia lolos tanba osan ne'e iha mak kuandu ita aprova ona  parlamentu dehan osan iha ona atu ba halo atividade ida, agora ita laiha mós ita promete, prontu ita-boot sira mak hatutan ba para povu kuandu manán karik dehan osan entrega lalais la bele osan ne'e depois bolsu kuak”, dehan nia iha Parlamentu Nasionál, tersa (12/04).

Tanba realidade mak ne'e, nia hanoin povu ne'e merese líder ida ne'ebé ko'alia ho lojika ko'alia tuir lei, regra ne'ebé iha, tanba atu hetan ema nia votu tenke promete buat ne'ebé la'ós Prezidente nia kna’ar atu promete, kandidatu tenke klaru ho ida ne'e.

“Prezeidente halo tuir buat ne'ebé tau ona iha konstituisaun, mas kuandu ita hakarak halo buat Prezidente halo hotu, ita tenke muda konstituisaun ita ba sistema prezidensiál, ne'ebé Prezidente tur iha ne'ebá manda e manda duni, mais agora lae o tur iha ne'ebá, o halo tuir buat ne'ebé o iha”, katak nia.

Ba Prezidente Repúblika ida tenke halo halo buat ne'ebé tau ona iha konstituisaun, maibé promesa sira ne’e iha eleisaun Parlamentar nia bele konkorda, tanba parlamentu sei hamosu Governu hodi bele hala’o programa hirak ne’e.

“Mais Prezidente ba promete atu fó osan ne'e karik tuir mai manán ho 42, 45 iha eleisaun parlamentar ita muda konstituisaun, ita bele muda tau Prezidente ida mosu mai ne'e tau ba ho sistema prezidensiál ita halo buat di'ak, tuir buat ne'ebé agora Indonézia ho Amerika halo karik povu hakarak”, haktuir nia.

Antes ne'e, Kandidatu Prezidente Repúblika (PR), Francisco Guterres ‘Lú Olo’ hatete, nia parte sei husu Governu aatu kria proposta hodi fó subsíidiu ba kada uma-kain montante $200 iha fulan-dezembru tinan 2022.

“Hahú kedas iha fulan-dezembru agora, sei implementa programa ida ne'e, katak família ida sei simu to'o ate $200 dolar”, dehan Lú Olo hafoin hala'o nia komísiu kampaña segundu volta ba loron daruak iha Suai-Covalima, domingu (03/04).

Tanba Primeiru Ministru, Taur Matan Ruak, rasik aseita ona proposta ida ne'ebé mak kandidatu Lú Olo hato'o nia liuhusi komísiu kampaña segundu volta ba loron dahuluk iha Gleno, no ida ne'e sei implementa bainhira nia eleitu sai Prezidente Repúblika iha segundu volta.

Durante iha komisiu kampañaz Lú Olo deside ko'alia asuntu ne'e ho, Taur Matan Ruak, nu’udar Xefe Governu tanba kada tinan Governu halo dekretu lei désimu terseiru ba funsionáriu kada fulan-dezembru, nune’e povu mós iha direitu atu simu. (*)