Jestór Prinsipál Fundasaun Mahein (FM), Abel Amaral hatete, lisensa annual husi PM Taur la fó impaktu ba servisu Governu nia, tanba kompeténsia no servisu ba membru Governu atubele koontinua servisu sira.
“Ha'u hanoin PM nu'udar Ministériu Interior mós, bainhira nia atu lisensa ida ne'e ninia direitu nu'udar sidadaun, e kona-ba ninia kargu PM nomós Ministériu Interior, ha'u hanoin Instituisaun Estadu ne'e la depende ba ema ida, tanba ne'e ha'u hanoin ida ne'e la fó impaktu ba mákina Estadu ka Governu ninia servisu”, dehan Abel Amaral, iha edifísiu Fundasaun Mahein, Bairo Sentrál, kinta (31/03).
Tanba iha Instituisaun Estadu no privadu sira, bainhira ema ida asume kargu ruma atu lisensa, hatene hodi delega ema atubele responsavel ba servisu hirak ne'ebé nia hodi kontinua.
“Ha'u fiar PM fó ona kompeténsia ba Ministériu sira ne'ebé nia tutela bainhira nia aujénsia, nia hatene muito bem bainhira nia aujénsia se mak sei responsavel ba servisu ninia, tanba ne'e ha'u hanoin laiha impaktu ruma bainhira PM hatama karta lisensa”, afirma nia. (*)
