Tanba Horta la fiar, Prezidente PD Asanami deklara, PD nunka buka kandidatu Prezidente Repúblika, José Ramos Horta, atu hasoru hodi fó apoiu iha eleisaun segunda volta, maibé hakarak promove diálogu ho kandidatu sira hotu.
“Ha’u lahatene kona-ba informasaun ne'ebé iha mídia sira fó sai maibé ha’u koñese deklarasaun husi Partidu Demokrátiku (PD) nian, apoiu iha segundu volta ba Eleisaun Prezidensial Períodu 2022-2027”, dehan Kandidatu Horta iha Edifísiu AHDMTL, Manleuna, kinta (31/03).
Kandidatu númeru 1 ne’e mós hahú hahasoru malu ho lideransa PD nia hodi ko’alia kona-ba apoiu iha eleisaun segunda volta, maibé lahatene informasaun ne’ebé deklera husi Prezidente PD.
“Ami hahú mobiliza malu ba votasaun segundu volta. Enkontru ami hala'o ona ho Prezidenti Partidu Demokratiku (PD) Enjeñeiru Mariano ‘Assanami’ Sabino, sr. Antonio Kalohan no membru sira. Maibé Relasiona informasaun iha mídia ne'e, foun ha’u lahatene”, hakatenik nia.
Ba Tenente Jenerál Reformadu Leren Anan Timur, Horta rasik seidauk hasoru direta, maibé hasoru malu ona ho Prezidente Partidu CNRT, Kay Rala Xanana Gusmão.
“Ha’u seidauk kontaktu ba Lere Anan Timur, maibé ha’u fiar Maun Boot Xanana hasoru malu ona ho Lere Anan Timur (LAT) no ha’u lahatene sira ko’alia saida. Maibé ha’u-nia relasaun ho Lere Anan Timur di'ak no ha’u la buka ema iha tempu eleisaun nia laran, ne'e nia hatene”, deklara nia.
Iha ne’e Kandidatu Horta mós ko’alia ona ho líder hothotu husi Partidu boot no Partidu ki'ik, hasoru mós ho membru balun husi Partidu Libertasaun Popular (PLP) no Partidu Kmanek Haburas Unidade Timor Oan (KHUNTU).
Ba kampaña eleisuan Segundu Volta ne'e, sei lahalo Komísiu iha fatin barak, maibé sei konsentra de'it iha mini komìsiu no Dor to dor ne'e hahú ona.
Prezidente Partidu Demokrátiku (PD), Mariano ‘Asanami’ Sabino deklara, PD nunka buka kandidatu Prezidente Repúblika, José Ramos Horta, atu hasoru, maibé hakarak promove diálogu ho kandidatu sira hotu.
Tanba pelemika ne’ebé mosu iha públiku katak, Partidu Demokrátiku hasoru Kandidatu Horta hodi fó apoiu iha segunda volta, maibé delegasaun PD ne'ebé hasoru kandidatu Horta tanba kandidatu rasik mak konvida, la’ós PD mak hakarak hasoru.
“Ha'u hanoin ne'e lalos, tanba PD nunka buka, tanba PD nia votu ne'e tun, mais wainhira ema mai atu hasoru PD, PD nu'udar jerasaun foun mak ba hasoru, la pantas ita hein iha uma e depois avó Horta mai iha uma para hasoru, nia mak konvida, nia hakarak hasoru e nia hakarak mai uma, ami dehan di'ak liu ha'u delega para ema ba hasoru duke nia tenke mai uma”, esplika Asanami iha Parlamentu Nasionál, tersa (29/03).
Tanba PD la'ós partidu ida ne’ebé bainhira ema seluk presiza nia mak mai, maibé PD hakarak diálogu fó hanoin ba kandidatu balun karik sai Prezidente oinsá halo di'ak ba nasaun no ba povu.
“La presiza dehan o mak presiza ha'u, ha'u mai, PD la'ós ida ne'e, PD hakarak diálogu, ko'alia e fó nafatin hanoin karik balun sai prezidente oinsá halo di'ak rai ida ne'e, povu ida ne'e, PD halo ona programa ne'ebé ke ba povu tomak, mais prontu povu nia desizaun mak ne'e, PD respeitu povu nia desizaun”, hatutan nia.
Ba delegasaun ne'ebé hasoru Kandidatu Horta, lolos kontinua ba kandidatu sira seluk, maibé ho polemika ne’ebé mosu halo PD seiduak bele hasoru kandidatu sira seluk.
“E nune'e mós delegasaun ne'ebé ha'u fó ne'e atu halo kontaktu mós ba kandidatu hothotu, soke iha dalan klaran prontu iha polemika oituan saida sira ne'ebé, seidauk konsege hotu, mais PD kuandu votu tun nia la buka ema, nia tenke hein”, dehan nia.
Bainhira desizaun tribunál fó sai iha segunda volta PD sei halo konferénsia nasionál iha loron 31 fulan-marsu hafoin bele deside apoia kandidatu ida, maibé dadaun seiduak iha desizaun.
“Atu tuir se ne'e orsida konferénsia mak sei deside iha dia 31 ne'e, ne'ebé públiku hanoin dehan PD mak buka ne'e lalos, PD votu lakon ne'e, halo hanusa mak PD buka, mais PD kuandu ema husu para mai hasoru, PD di'ak liu PD ba hasoru. Rai ida ne'e ba ita, Lasama sempre dehan ita-nia dignidade la as liu dignidade povu nian, ita hanesan baibain ita ba hasoru eis Prezidente, eis titulár buat sira ne'e ita la pantas nia tenke mai uma para hasoru”, afirma Asanami.
Antes ne’e, Sekretáriu Jerál Partidu Demokrátiku (PD), Antonio da Conceição ‘Kalohan’, deklara fó apoiu ba Kandidatu husi partidu CNRT iha eleisaun Prezidensiál segundu volta, tanba kandidatu Horta ne’ebé konsege hetan votu liu rihun-atustolu, iha primeira volta.
“Tanba tenke depende interrese povu nian ho kandidatu ida ho nia votu mais de 300.000 ida ne'e mak ami hanoin dehan katak posivelmente kandidatu ida ne'ebé mak sai duni ona alternativu, atubele hadi’a situasaun no haktuir katak Prezidente partidu PD ko'alia ona katak, partidu nia desizaun ida ne'ebé atu afirma polítika de'it maibé eskolla ne'e iha ona povu nia liman, preferénsia ne'ebé mak seidauk ida ami-nia ne'e mak agora dadaun povu fó tiha ona, sedu ka tarde la'ós ona tempu ami atu ko'alia, ami so reprezenta de'it povu ne'ebé mak fó fiar tiha ona ne'e”, dehan António Kalohan ba jornalista sira liuhusi Konferénsia Imprensa iha Sede PD, tersa (22/03).
Haree ba razaun no deklarasaun ne’ebé fó sai hatudu katak, rezultadu finál Provizóriu ne’ebé fó sai husi Orgaun eleitorál hanesan Sekretáriadu Tékniku Administrasaun Eleitorál (STAE) iha loron segunda (21/03) hatudu Kandidatu Prezidente Repúblika (PR), José Ramos Horta hetan votu 301481 ho pursentu 46,58 (46,58%) husi totál votu validu ne’ebé apuradu husi STAE hamutuk 647172 kompara ho Kandidatu Francisco Guterres ‘Lú Olo, ne’ebé hetan votu 143408 ho pursentu 22,16%, iha pozisaun segundu.
Nune’e Partidu Demokrátika informa ona povu nia lian ba Kandidatu Prezidente Repúblika, José Ramos Horta, tanba povu nia lian ne'ebé mak maioria 300.000.
Dadaun la'ós ona tempu atu fó apoiu ba partidu FRETILIN maibé sei fó apoiu ba partidu ida ne'ebé mak votu maioria.
“FRETILIN ninian ami halo tiha ona iha períodu 2020 mai to'o agora ne'ebé ami sente dehan katak karik sei iha biban ida atu halo, e ami fó tiha ona”, afirma nia.
Tanba durante PD fó apoiu ba partidu FRETILIN iha períodu 2020 to'o agora la konsege kompensa PD nia hakarak ne'ebé mak hein durante ne'e.
“Ami hanoin dehan buat ne'ebé mak ami fó tiha ona, la kompensa saida mak ami hein ne'e, tanba ida ne'e mak ami hanoin la'ós ona oportunidade atu hanaruk filafali espetativa ida ne'e agora povu hein tiha ona desizaun ida ne'ebé lais liu nian, e povu mós terus tiha ona”, akresenta nia.
Iha loron tersa (22/03), Sekretáriu Jerál Partidu Demokrátiku, António da Conceição ‘Kalohan’, akompaña Vise Sekretáriu Jerál PD hasoru Kandidatu Prezidente Repúblika ho númeru, Jose Ramos Horta iha nia rezidénsia Faról. (*)
