“Sim, ha’u halo komunikasaun direta ho kandidatu tanba realidade ami na'in-16 mak tama mais, kandidatu na’in-rua mak liu iha segundu ronde, ami agora komunikasaun depois hodi bele servisu ba oin”, dehan nia hafoin audénsia ho José Ramos Horta iha nia rezidénsia Farol, kuarta (23/03).

Ba apoiu ne'e, hetan ona resposta pozitivu husi kandidatu José Ranos Horta, tanba hanesan kandidatu ne'ebe hetan votu barak liu, komunikasaun ne'ebé mak halo, no pozitivu ba hanoin ne'ebé mak di’ak ba povu no rai ida ne'e.

Kona-ba votu hira mak sei fó ba kandidatu Horta, ida ne'e, labele fó sai direta maibé felismente ko’alia ona ho kandidatu José Ramos Horta mak sei fó sai ba públiku.

Pozisaun fó apoiu ba kandidatu Horta tanba, razaun fuan, hodi hanoin rai ida ne'e ba oin, di'ak mak ida ne'ebé, aat mak ida ne'ebé, tanba ne'e mak buat hothotu sei entrega ba kandidatu mak sei ko'alia ba públiku.

Kandidatu José Ramos Horta hatete, nia parte simu ona komunikasaun no kontaktu oioin husi kandidatu inklui Partidu Polítiku balun ne'ebé antes ne'e fó ona apoiu ba sira-nia kandidatu ne'ebé lakonsege hakat ba eleisaun iha segundu volta nian.

“Iha kontaktu oioin kada kandidatu balun, ita-boot sira hatene ne'e, agora ami na’in-rua kandidatu seluk, balun simu hanesan ha’u hatete ne'e, ha’u-nia kandidatura iha primeiru ronde kedas simu apoiu husi hothotu, agora tanba de'it iha kandidatu rua, ha’u ho Prezidente FRETILIN ‘Lú Olo’ buka de'it atu primeiru konsolida votasaun hetan iha primeira ronda, 300 itál mil, para haree se bele aumenta tán”, dehan nia.

 Parte husi eleitoradu partidu sira seluk nian, kandidatu iha primeira volta, hanesan Partidu Demokrátiku nian, Jeneral Lere nian, KHUNTO, no PUDD ne’ebé apoia ofisialemente.

Tanba ne'e, iha kandidatu balun mak hahú ko'alia ona maibé labele hatete klaru, tanba ne'e hanesan sira rasik husu labele fó sai, no sira mak sei komunika inklui kandidatu balun mós ohin ka aban, sira sei ko'alia sai ba públika kona-ba sira-nia pozisaun.

"Purtantu ha’u kontente loos ho rezultadu boot e ha’u konfiante ke votasaun sei konsolida aumenta tán iha segunda ronda”, hatete nia.

Nu’udar kandidatu, ko’alia kona-ba kampaña sei haree lai formatu kampaña saida, maibé hanoin pesoalmente lalika halo komísiu barak-barak tanba povu mós kolen, lalin ba lalin mai husi Aldeia, Suku, Sub-distritu mai Munisípiu-Vila.

“Tempu sira presiza ba sira-nia servisu, sira-nia agrikultór, ou joven sira ba sira-nia estudu, profesionál sira, maibé ne'e desizaun seidauk halo, ne'e ha’u mós depende ba CNRT e apoiante sira seluk”, dehan nia.

Maibé ba eleisau segundu volta ne'e, Horta prontu tun filafali ba baze, iha munisípiu Dili ka iha fatin ne'ebé de'it, atu nune'e konsolida votu bele aumenta.

“Ikus liu mak ne'e, Kandidatu barak kontaktu ha'u rasik, iha partidu balun ke apoiu kandidatu mós kontaktu ona, e kontaktui kontinua ohin e aban, ho eis kandidatu e partidu politiku sira. Akordu polítiku laiha purenkuantu, eh sira ne'ebé mai ko’alia ho ha'u ne'e, sira mai para fó de'it apoiu ou hakarak rona buat seluk, ba sira atu apoiu hau ne'e sira apoiu ona”, esplika Horta. (*)